Во вооружениот инцидент синоќа загинаа Јетон Кривањева и Енез Исени, а повредено е и трето лице. Полицијата работи на расветлување на мотивите на убиството, додека за сторителите на делото засега се знае само дека нивниот автомобил е пронајден запален во близина на скопската населба Визбегово.
Според полицијата, Кривањева познат по прекарот „Жила“ и Исени познат по името „Лачи“ биле нападнати од 5 маскирани и униформирани лица, при што од здобиените повреди починале на местото на настанот. Повреден е Техла Али (34), кој се претпоставува дека работел како келнер во кафеаната каде што се случил инцидентот на патот што ги дели Скопското Кале и Старата чаршија. Автомобилот во кој се сомневаат дека се движеле сторителите е пронајден изгорен 20 минути по инцидентот. Јавното обвинителство ги собра доказите од местото на настанот и со безбедносните камери работи на откривање на сторителите и откривање на траекторијата на движењето.
„Сите материјални докази прибавени на местото на настанот ќе бидат предмет на вештачење. Обезбедени се снимките од безбедносните камери во објектот каде што се случија убиствата, околните објекти меѓу кои и снимките од системот „Безбеден град“. Обвинителот на случајот наредил да се направат информативни разговори со повредениот и со други лица кои биле присутни во кафеаната во моментот кога се случиле убиствата“, наведуваат од ЈО.
Мотивите сè уште остануваат непознати, иако постојат сомневања за некои траги, меѓу кои и одмазда и бизнис пресметки.
