САД ќе продолжат да поддржуваат влади, партнери од граѓанското општество, независни медиуми и граѓани во борбата против организираниот криминал и искоренување на корупцијата, одговорија од прес-службата на Стејт департментот, на прашањето на Гласот на Америка на македонски дали САД се една од петте држави што обезбедиле меѓународна правна помош за прибавување докази во истрагата за „Скопје 2014“.
Основното јавно обвинителство во петокот соопшти дека спроведува истражна постапка против 15 физички и 7 правни лица за злоупотреба на службена положба и перење пари за 11 споменици, при што наводно биле испрани над 16 милиони евра буџетски пари.
„Борбата против корупцијата во Западен Балкан е главен приоритет на администрацијата на Бајден. САД ќе продолжат да поддржуваат влади, партнери од граѓанското општество, независни медиуми и граѓани во борбата против организираниот криминал, искоренувањето на корупцијата, зголемувањето на транспарентноста, спроведувањето на одговорноста и дополнително зајакнување на владеењето на правото и демократските институции“, изјави портпарол на Стејт департментот.
Во изјавата стои дека „ лидерите на Северна Македонија мора да покажат силни, опипливи резултати во борбата против корупцијата, преку зајакнување на институционалната независност и ограничување на политичкото мешање, особено во судството, што е од суштинско значење за исполнување на целите за пристапување во ЕУ и градење доверба на граѓаните во владата“.
Меѓу осомничените во истрагата, со кодно име „Феникс“, се и поранешниот премиер Никола Груевски, кој избега во Унгарија, и ексминистрите за финансии и за култура Зоран Ставрески и Елизабета Канческа-Милевска.
Ексградоначалникот на општина Центар Владимир Тодоровиќ доби мерка куќен притвор, а изречени се и други мерки притвор и полесни мерки за обезбедување на осомничените.
Истрагата утврдила дека за леење на спомениците „Воин на коњ“, „Гоце Делчев“, „Даме Груев“, „Методија Андонов – Ченто“,„Основачи на ВМРО“, „Цар Самоил“, „Јустинијан Први“,„Никола Карев“, „АСНОМ“ и лавовите поставени на мостот „Гоце Делчев“, биле исплатени над 57 милиони евра, а постои сомнение дека биле испрани на 16 милиони евра кои завршувале на различни банкарски сметки.
Според официјалните информации на Обвинителството, кои беа презентирани на прес-конференција, кривичното дело било извршено во перидот од 2007 до 2013 година.
САД неодамна го ставија на црна листа градоначалникот на Струга Рамис Мерко за вклученост во значајна корупција, а лани ги означија и поранешниот премиер Никола Груевски и поранешниот директор на Управата за безбедност и контраразузнавање Сашо Мијалков.
И заменик-помошникот секретар за одбрана на САД за европска и НАТО политика Спенсер Бојер, за Гласот на Америка на македонски во четвртокот, рече дека е важно за регионалната и глобална безбедност Северна Македонија да се фокусира на демократијата и владеење на правото.
„Се разбира, ние се грижиме за демократијата и владеењето на правото во целина за сите наши сојузници и партнери. Сметаме дека фокусирањето на тие работи и постоењето силни демократии се важни за да се има силни системи за да бидат отпорни, да придонесат пошироко за регионалната и глобалната безбедност. Така што тоа е секогаш важно“, рече Бојер.
