Министерката за труд и социјална политика Јованка Тренчевска денеска имала средба со новоименуваниот амбасадор на Република Австрија во земјава, Мартин Памер, посакувајќи му добредојде, успешна работа и продолжување на досегашната одлична соработка во областите кои се во надлежност на Министерството за труд и социјална политика (МТСП).
-Соговорниците зборуваа за прашања од социјалната сфера, вработувањето и пазарот на труд, детската заштита, семејното насилство и механизмите за заштита од насилство, соопшти МТСП.
Министерството посочува дека Тренчевска информирала за состојбата во државата, социјалните права и сервиси наменети за ранливите категории на граѓани, осврнувајќи се на социјалната реформа и придобивките од нејзиното воведување.
-Системот на социјална заштита е флексибилен, за да може да ги прими сите оние граѓани кои ќе станат социјално ранливи. Но, целта на социјалната реформа не е тие да останат во системот, туку да ги активираме на пазарот на труд. На активацијата на корисниците на Гарантирана минимална помош, засилено ќе работиме наредниот период заедно со Агенцијата за вработување, центрите за социјална работа и со поддршка на европските партнери, истакнала Тренчевска.
На средбата се разговарало и за недостигот на работна сила, како и за мерките од Оперативниот план за активни програми и мерки, со кои на невработените лица им се помага преку различни обуки да станат поконкурентни на пазарот на труд, но и мерките за самовработување односно започнување сопствен бизнис.
Се разговарало и за Ромите како една од најранливите категории на граѓани и насоченоста на оваа Влада за целосна инклузија на сите етнички заедници во општеството да бидат активни чинители во сите сфери.
-Министерката информираше и за состојбата со насилството во државата, механизмите за заштита од насилство, носењето Закон за заштита од насилство врз жените и семејно насилство, воспоставувањето на шелтер центрите за жртвите од насилство, советувалиштата, мултисекторскиот пристап на институциите, при што ја истакна и важноста од подигањето на свеста за насилството и важноста од неговото пријавување, наведува МТСП во сопштението.
На тема згрижување и згрижувачки семејства министерката Тренчевска истакнала дека добрите практики и искуства токму од Република Австрија се особено значајни за напредок во оваа област и во Република Северна Македонија.
-Двете страни изразија уверување за продолжување на досегашната одлична соработка, соопшти Министерството за труд и социјална политика.
