Српскиот претседател, Александар Вучиќ, рече дека неговата земја го прекинува извозот на пченица, брашно, пченка и масло.
„Во последните два дена извозот на пченица и брашно е толку зголемен што мораме да го запреме“, рече вчера Вучиќ.
Во изјава за српската телевизија Б92, Вучиќ рече дека државата ќе субвенционира гориво за земјоделците.
„Ќе ја субвенционираме цената на евро-нафтата во сите бензински пумпи на српската нафтена индустрија да остане најмалку 179 динари [околу 1,5 евра] најмалку месец и половина. За сите останати ќе има минимално зголемување“, рече Вучиќ.
Вучиќ додаде дека Србија ја чека одлуката на Европската унија за увоз на енергија од Русија.
САД вчера го забранија увозот на нафта од Русија, како санкција за воената агресија врз Украина.
„Ако одлуката е да се забрани увозот на сите енергенси од Русија, тогаш и ние сме во неволја. Немаме каде да ги однесеме, нафтата и гасот не можат да паѓаат од небо“, рече Вучиќ.
Зборувајќи за состојбата на стоката на Србија на 2 март, Вучиќ рече дека Србија е подготвена најмалку за следните два месеца.
По руската инвазија на Украина на 24 февруари, Србија го поддржа територијалниот интегритет на Украина, но не ги почитуваше санкциите на ЕУ против Москва.
