Специјалната платформа за пријавување и закажување термин за вакцинација во Грција, попладнево ќе биде пуштена во употреба, а следната седмица, на 20 јануари започнува вакцинацијата на населението, јави дописничката на МИА од Атина

Во првата фаза ќе се вакцинираат лицата над 85 година, потоа оние над 75 и ќе следат граѓаните од 65 годишна возраст.

По регистрацијата на платформата, граѓаните преку смс порака ќе бидат известени за терминот за вакцинација.

Специјалната платформа попладнево, официјално ќе ја презентира генералниот секретар во Министерството за здравство на Грција Мариос Темистоклеус, по што и ќе биде отворена за граѓаните.

Вакцинацијата во Грција започна на 27 декември 2020 година, а од минатата седмица се вакцинираат здравствените работници, како и вработените и граѓаните згрижени во домовите за стари лица.

Заклучно со вчера во Грција биле вакцинирани вкупно 44.080 лица.