Советот на Европа донесе одлука да го прекине мониторингот над Бугарија. Веста ја соопшти во објава на Фејсбук Деница Сачева, потпретседател на Парламентарното собрание на Советот на Европа (ПАСЕ), јавува 24 часа, пренесува Трибуна.
Со гласање во пленарна сала, мнозинството од сите политички групи ја поддржа специјалната резолуција за Бугарија. Во неа се истакнува дека земјата постигнала значителен напредок во зајакнувањето на демократијата, владеењето на правото и заштитата на човековите права. Дополнително, се нагласува дека се спроведени клучни реформи во судскиот систем, борбата против корупцијата и заштитата на слободата на изразување. Усвоени се и законски измени за поголема заштита на жртвите на семејно насилство, за борба против говорот на омраза и за подобра заштита на новинарите.
Сачева потсети дека Европската комисија веќе го укина и Механизмот за соработка и проверка, а од 1 јануари 2026 година Бугарија ќе стане членка на Еврозоната.
Иако мониторингот е укинат, ПАСЕ нагласи дека ќе продолжи да го следи развојот во Бугарија преку редовни периодични прегледи.
Работата на резолуцијата траеше речиси две години. Во јуни, лидерот на ГЕРБ Бојко Борисов се сретна со претседателот на ПАСЕ, Теодорос Росопулос, кој ја посети Бугарија по покана на бугарскиот парламент и повика на укинување на процедурата за мониторинг врз земјата.
