Сојузот на стопански комори потпиша Меморандум за соработка со Стопанската комора на Република Чешка, согласно кој двете деловни организации заеднички ќе делуваат во насока на унапредување на економската соработка и зголемување на трговската размена, преку воспоставување на директна комуникација меѓу деловните ентитети.
Меморандумот за соработка го потпишаа претседателот на Сојузот, Трајан Ангелоски и директорот на Стопанската комора на Чешка, Јиржи Хансл во присуство на високи претставници на организациите и деловните заедници од двете земји по одржана билатерална средба.
Како што соопштија од Сојузот на стопански комори, договорот предвидува двете комори да ја продлабочат соработката во насока на склучување на директни партнерства за зацврстување на деловните релации меѓу претставници на бизнис заедницата преку разменување на информации, организирање и промоција на заеднички настани, организирање на посети на деловни делегации, размена на експертиза, соработка на меѓународни проекти и други активности.
Потпишувањето на Меморандумот се реализира во рамките на Македонско-чешки бизнис форум кој ќе се одржи утре во Скопје, во организација на Сојузот на стопански комори на Македонија и Амбасадата на Република Чешка.
Како што е најавено, во рамки на бизнис форумот ќе се обратат и заменик министер за индустрија и трговија на Чешката Република, Едуард Муржицки и амбасадорот на Чешката Република во Скопје, Јарослав Лудва. По обраќања на владини претставници ќе има презентација на чешките компании, по што следува и работниот дел во кој ќе се реализираа директни бизнис средби.
Република Чешка спаѓа во групата на земји со најголем обем на размена со нашата држава. Во изминатата 2021 година од нашата држава во Чешка се извезени стоки во вредност од 111 милиони евра, со што се бележи раст на извозот од 78 отсто, додека вредноста на увозот изменува 128 милиони евра.
