Министерството за внатрешни работи поднесе кривична пријава за 29-годишен Скопјанец со иницијали М.Б за уцена. Имено, тој уценувал 32-годишна скопјанка да му плати 1500 евра за да не објави компромитирачки видеа и фотографии од неа. Таа му платила 500 евра, а сето тоа под назор и документација од МВР.
Во соопштението на МВР се вели:
Секторот за внатрешни работи Скопје – Единицата за насилен криминал до надлежното Основно јавно обвинителство во Скопје поднесе кривична пријава против М.Б. (29) од Скопје, поради основано сомнение дека сторил кривично дело „Уцена“ предвидено и казниво по член 259 од КЗ. Пријавениот во периодот од 21.01.2021 до 31.01.2021 со намера да се стекне со противправна имотна корист ја уценувал А.Б. (32) од скопско и побарал 1500 евра за да не сподели нејзини фотографии и видео клипови со компромитирачка содржина на социјалните мрежи.
Притоа, на 31.01.2021, во 15:35 часот пријавениот, по претходен договор, се сретнал со оштетената во кафе бар на Плоштад Македонија – Скопје, каде противправно земал 500 евра, кои му биле предадени од страна на оштетената, при што од страна на СВР Скопје настанот е соодветно документиран.
