До 08:30 часот утрово во Македонија се регистрирани вкупно шест пожари, од кои еден сè уште е активен, а пет се ставени под контрола, информира Центарот за управување со кризи (ЦУК).
Активниот пожар е во Општина Кавадарци, во близина на Тиквешкото Езеро, каде пламените зафатиле нискостеблеста шума и сува трева. Екипите работат на негово локализирање, но гаснењето е отежнато поради сувата вегетација и повремениот ветер.
Во меѓувреме, пет други пожари кои вчера предизвикаа сериозни проблеми се под контрола. Во Македонски Брод, во повеќенаменското подрачје „Јасен“, е спречено ширење на огнот кој зафати мешана шума. Стабилизиран е и приземниот пожар на планината Кожуф во Општина Гевгелија, каде екипите остануваат на терен за да не дојде до ново разгорување.
Два пожара беа регистрирани и во Општина Желино – во селото Мерово, каде изгоре дел од мешана шума, и во селото Церово, каде беа зафатени ниска вегетација и делови од шума. Жариштата се под контрола, но поради високите температури ризикот од повторно разгорување останува.
Во селото Долгаец, во Општина Долнени, пожар зафати мешана шума, но и таму состојбата е стабилизирана.
Надлежните апелираат на внимателност, бидејќи сувата вегетација и летните горештини овозможуваат брзо ширење на пожарите, а најмал невнимателен потег може да предизвика сериозни последици.
