„Ние сме Коко Фарм – семејна фарма за одгледување на пуштени кокошки во с. Чардаклија Штип. Со генерации сме поврзани со животните и научени сме да ги сакаме, почитуваме и да се грижиме за нив со особено внимание. Токму затоа ние бевме едни од првите одгледувалишта на кокошки во Македонија што пред 6 години се одлучи да ги одгледува на ваков алтернативен начин. Грижата и љубовта кон кокошките ја покажуваме преку почитување на нивната слобода, правилна исхрана без употреба на штетни супстанци, одлични услови за дневен престој на отворено, безбедна и топла фарма за спиење преку ноќ. За ова работиме, за ова се трудиме и за ова пропагираме хуман пристап во живинарството.“ вели Андреј.
Кокошките поголемиот дел од денот го поминуваат во огромниот двор.
„Нашето јато има просторна фарма во која ги поминува ноќите и во која може да се засолни доколку времето е ладно и огромен двор во кој го поминува поголемиот дел од денот.“
Освен што добиваат оброци од проверено локално производство, кокошките можат да јадат се што ќе најдат во земјата.
-Исклучително внимание посветуваме на исхраната на нашето јато. Житарките што се вклучени во секојдневните оброци се од проверено локално производство, а покрај нив, кокошките го имаат и луксузот да јадат се што ќе најдат во земја. Во нивниот двор има секогаш по некоја овошка или јатка што придонесува за уште поздрав производ.“
„Она што не позиционира пред останатите конкуренти е фактот што нашите јајца стигнуваат свежи до крајниот потрошувач. Секое јајце е рачно собрано, исчистено без никакви препарати, спакувано и доставено лично од нас.“, велат од Коко фарм.
Од фармата велат дека ќе продолжат да се борат за укинување на кафезното чување на кокошките.
„Ние работиме и ќе работиме на иницијативата за укинување на кафезното чување на кокошките, затоа што силно се бориме за правата на животните и нивната експлоатација. Пораката што сакам да ја упатам до младите фармери е секој да излезе на пазарот со свој производ по кој ќе бидат препознатливи, да ги следат и практикуваат современите трендови и алатки, да создадат една примамлива маркетинг приказна за својот производ бидејќи само така можат да бидат успешни во модерното време.
