Денеска, рускиот агресор изврши еден од најмасовните воздушни напади оваа година на територијата на Украина. Агресорите употребија бараж од најразлично оружје и муниција.
ЦИВИЛ МЕДИА доби извештај од раководителот на Кијивската градска воена администрација, Сергиј Попко, со посредство на Амбасадата на Украина, во кој се јавува за најмалку две фатални жртви и 17 повредени, само во Кијив и околните реони.
Се работи за голем напад кој бил подготвуван подолго време и се совпаѓа со ист таков напад пред точно една година, на истиот напад, во пресрет на новогодишната прослава.
Беа употребени дронови од типот Shahed, крстосувачки ракети Х-22/Х-32 од стратешките бомбардери Ту-22М3, балистички ракети, С-300, крстосувачки ракети Х-101/Х555 од стратешки бомбардери Ту-95 МС, аеробалистички ракети од типот X-47M2 „Кинжал“ од Миг-31К.
Во Кијив, воздушната тревога беше објавена три пати и вкупно траеше речиси 5 часа. За време на последната тревога, главниот град беше нападнат од неколку десетици ракети од различен тип и калибар.
Во воздушниот простор на градот Кијив, ракетите влегоа брановидно и од различни правци.
Повеќе од триесет воздушни цели беа соборени од украинските сили за противвоздушна одбрана над Кијив.
Но, како резултат на таков масовен ракетен напад во главниот град, за жал, има уништување и жртви.
Оштетена е зградата на метро станицата Лукјанивска, влезот во метрото е затворен, возовите ја поминуваат станицата без застанување.
Штетите предизвикани во различни реони на главниот град се големи.
Во Подилскиот реон нападот предизвика пожар во магацин на површина од околу 3.000 квадратни метри. Државната служба за итни случаи веднаш започна со санирање на последиците.
Во Свјатошинскиот реон, евидентиран е пожар во станбена зграда која е, за среќа, ненаселена, а се запалија и три цивилни автомобили. И двата пожари се изгаснати.
Во Шевченкивскиот реон предизвикан е пожар во недоизграден деловен центар, оштетување на станбена зграда, а избија пожари и во неколку гаражи, магацини и една ненаселена станбена зграда. Службите за противпожарна заштита веднаш дејствуваа и ги изгасија пожарите.
Во Дарницкиот реон беше оштетена една станбена зграда и една приватна куќа.
Овие напади врз главниот град предизвикаа и човечки жртви. Во овој момент, евидентирани се двајца загинати и 17 повредени цивили. На повредените им се пружа медицинска помош.
„Оперативните збирни информации постојано се утврдуваат и ажурираат. Симболично, во стилот на рашистите, пред точно една година, на 29 декември 2022 година, агресорот врз Кијив изврши еден од најмасовните комбинирани воздушни напади врз Украина. Тој ден над Кијив беа соборени сите 16 ракети. Како тогаш, така и сега, непријателот не нè скрши и не нè заплаши. Ние ќе издржиме и покрај сè. Верувајте во Вооружените сили на Украина. Верувајте во нашата победа“, изјави раководителот на Кијивската градска воена администрација, Сергиј Попко за ЦИВИЛ МЕДИА, со посредство на Амбасадата на Украина.
Со своја изјава излезе и украинскиот претседател, Зеленски, кој ја информира јавноста за рактениот терор и за последиците од него. Тој вети дека ќе следи одговор на овие напади.
„Сигурно ќе одговориме на терористичките напади. И ќе продолжиме да се бориме за безбедноста на целата наша држава, секој град и секој граѓанин. Рускиот терор мора да изгуби и ќе изгуби“, изјави Зеленски, меѓу другото.
A maternity ward, educational facilities, a shopping mall, multi-story residential buildings and private homes, a commercial storage, and a parking lot. Kyiv, Lviv, Odesa, Dnipro, Kharkiv, Zaporizhzhia, and other cities.
Today, Russia used nearly every type of weapon in its… pic.twitter.com/q5q8Q98Njr
— Volodymyr Zelenskyy / Володимир Зеленський (@ZelenskyyUa) December 29, 2023
ЦИВИЛ, како организација за човекови права, најостро го осудува овој чин на агресија на руските сили врз цивилното население на Украина и изразува целосна солидарност и поддршка за претседателот Зеленски и украинската нација.
Овој ракетен терор мора да престане! – повикува ЦИВИЛ и ја алармира домашната и меѓународната јавност и релевантните институции да ја интензивираат економската и воената помош за Украина, особено со муниција и системи за противвоздушна одбрана, како и со финансиски средства потребни за основно функционирање на земјата која речиси две години е жртва на геноцидна воена инвазија.
Џ. Дерала/Civilmedia.mk
