*Околу 130 луѓе досега се спасени од подрумот на театарот погоден од руски воздушен напад во опколениот јужен украински град Мариупол, соопштија официјални лица. Стотици луѓе се криеја под театарот, кој беше назначен како засолниште за раселените цивили, кога беше нападнат во средата. Серхи Тарута, поранешен шеф на регионот Доњецк, рече дека спасувачките напори се попречени од целосниот распад на социјалните служби и стравот од идни руски напади во градот.
*Досега околу 30.000 цивили го напуштиле градот Мариупол, соопштија локалните власти. Градското собрание на Мариупол соопшти дека „80 отсто од становите се уништени“, а околу 350.000 жители се кријат во засолништа и подруми во Мариупол.
*Повеќе од 20 лица загинаа, а 25 се повредени кога руски воздушен напад уништи училиште и центар во Мерефа, во близина на североисточниот украински град Харков, соопштија локалните власти. Десет лица се во критична состојба.
*Американскиот Стејт департмент потврди дека еден американски државјанин загинал денеска во Украина, при руско гранатирање во северниот украински град Чернихив.
*Градоначалникот на опколениот украински град Мелитопол, кој наводно бил киднапиран од руските сили, бил ослободен во замена за девет заробени руски регрути, изјави шефот на претседателскиот кабинет на Украина.
*Се подготвува мировен договор меѓу Киев и Москва, но пробивот зависи од тоа Кремљ да прифати прекин на огнот, изјави украинскиот министер за одбрана Олексеј Резников, кој ја предводеше украинската делегација во преговорите, рече дека техничката работа напредува, но дека Русија мора да го прекине гранатирањето за да биде возможен каков било компромис.
*Турскиот министер за надворешни работи Мевлут Чавушоглу изјави дека „имаме посилни надежи за прекин на огнот“ по средбата со неговиот украински колега Дмитро Кулеба во Лавов. Состанокот уследи по вчерашната посета на Чавушоглу на Москва, каде што тој изјави: „Не ја изгубивме вербата во дипломатијата“.
*Западните власти предупредија дека останува „многу голем јаз“ меѓу Украина и Русија во мировните преговори меѓу двете нации.
*Володимир Зеленски се повика на падот на Берлинскиот ѕид во обид да ги убеди германските пратеници да направат се што е можно за да се запре руската инвазија на Украина. Говорејќи пред германскиот парламент преку видео, украинскиот претседател ја прекори Германија дека во минатото упорно инсистирала дека гасоводите Северен поток 1 и 2 и другите деловни проекти со Русија се „чисто економски“, а не политички.
*Американскиот претседател Џо Бајден в петок ќе разговара со кинескиот претседател Си Џинпинг за руската војна против Украина „и други прашања од взаемен интерес“, соопшти Белата куќа. Претходно, кинески функционер го критикуваше генералниот секретар на НАТО, Јенс Столтенберг, за неговите коментари дека Кина има обврска како членка на Советот за безбедност на ОН да помогне да се стави крај на војната во Украина.
