Речиси 60 бугарски компании ќе се претстават на 87. издание на Меѓународниот саем во Солун, Грција, што ќе се одржи од 9 до 17 септември во Меѓународниот саемски и конгресен центар во градот. Ова беше кажано на прес-конференција во Солун, на која присуствуваа бугарскиот заменик министер за економија и индустрија Николај Павлов заедно со заменик министерот за внатрешни работи на Грција Статис Константинидис, градоначалникот на Солун Константинос Зервас, регионалниот гувернер Апостолос Цицикостас, претседателот на организаторот на настанот „TIF HELEXPO“, Тасос Цикас, соопшти Министерството за економија и индустрија.
Оваа година Бугарија ќе биде почесна земја на изложбата. Националното учество на Саемот во Солун го организира Министерството за економија и индустрија.
„Речиси 60 бугарски компании и организации од различни сектори ќе го покажат новото технолошко лице на Бугарија“, рече заменик министерот Павлов. Тој додаде дека на бугарскиот национален штанд во Солун ќе бидат претставени организации и институции, меѓу кои Бугарската агенција за инвестиции (БАИ), Националната компанија за индустриски зони (НКИЗ), Бугарската академија на науките (БАН) и други. На посебни штандови со своите активности ќе се претстават десетици бугарски компании од различни сектори како висока технологија и ИТ, компании поврзани со прехранбената индустрија, образованието, транспортот, машинството и други.
Бугарското претставување свечено на 9 септември ќе го отвори премиерот Николај Денков во присуство на грчкиот премиер Киријакос Мицотакис. На изложбата ќе присуствуваат и министерот за економија и индустрија Богдан Богданов, министри и градоначалници, информираат од ресорот.
Планирано е рекламирање на Бугарија во сите промотивни и информативни материјали, одржување различни настани во Солун пред и за време на саемот во координација со локалните власти, серија специјални културни и други настани, билатерални средби со потенцијални партнери и презентации на земјата. Во последниве години, почесни земји на саемот беа Индија – 2019 година, Германија – 2020 година, САД – 2021 година и ОАЕ – 2022 година.
„За Бугарија е чест да биде почесна земја на 87-то издание на Меѓународниот саем во Солун. Истовремено, ова е признание за високото ниво до кое се достигнати политичките и економските односи меѓу Бугарија и Грција, како и за улогата на Бугарија во регионот“, рече заменик министерот Николај Павлов.
Тој го оцени бугарското учество како исклучително важно од аспект на тоа што Грција е меѓу клучните трговски партнери на Бугарија. Според заменик министерот, изложбата е можност да се продлабочат економските, инвестициските и културните односи меѓу двете земји, да се создадат нови партнерства, како и да се зголеми бугарскиот извоз во Грција.
Павлов најави дека во рамките на изложбата Министерството за економија и индустрија организира и грчко-бугарски бизнис форум, кој на 11 септември ќе го отвори министерот за економија и индустрија, Богдан Богданов. На него ќе учествуваат министри од двете влади, претставници на различни институции и бизниси. Акцент на форумот ќе биде ставен на унапредување на билатералните односи во областа на инвестициите, иновациите, инфраструктурата, енергетиката, туризмот и други.
