На 6 септември (сабота) со почеток во 12 часот, во Офицерскиот дом во Битола ќе биде промовирано првото книжевно дело „The blade is me“ од младиот писател Дарко Неделковски.
Приказната во книгата започнува со необичен сојуз – внатрешниот глас на авторот и еден измислен лик, кои одлучуваат да се вратат во неговото минато, од самиот момент на раѓањето, и чекор по чекор да стигнат до сегашноста. Нивното патување не е само хронологија: Тоа претставува длабока анализа на емоциите, искуствата и поуките што го обликувале авторот.
„Ова не е само моја приказна. Ликовите во романот свесно им се обраќаат и на читателите – им даваат до знаење дека не се сами, дека во секого постои внатрешен глас кој го турка напред. Делото испраќа силна порака: Да ја прифатиме и нашата темна страна, да се бориме со предизвиците и, најважно – да веруваме во себе. Оваа книга е напишана со една цел: Да допре до оние што се борат со депресија, што копнеат по подобро ментално здравје и сила за живот“, вели Неделковски.
Дарко Неделковски (роден на 11 декември 1995 година во Битола) е ентузијастички писател, креатор на содржини, уметник и видео уредник. Своето време го посветува на создавање креативна содржина – од кратки до подолги текстови – и ужива во „кршењето на четвртиот ѕид“ за да воспостави подлабока поврзаност со својата публика.
Инспирацијата ја наоѓа за време на своите секојдневни трчања, преку кои го расчистува умот и добива нови идеи. Како страствен читател, Дарко истражува жанрови како психологијата, за да стекне подлабоко разбирање за себе и за другите.
