Едно лице утрово е повредено при гаснењето на пожарот во Шутка од кој се креваат облаци густ црн чад. Министерството за внатрешни работи извести дека е пренесено в болница, а гасењето на пожарот продолжува.
„Денеска во 09.16 часот во СВР Скопје е пријавено дека на отпад за старо железо ул. „Б. Буна“ во Скопје има пожар односно дека горат хаварисани возила, на кои имало монтирано плински уреди и се слушаат детонации од истите. До сега нема зафатено приватен имот – куќи. Се преземаат мерки за гасење на огнот и расчистување на случајот. За време на интервенцијата едно лице е повредено и пренесено за укажување лекарска помош“, велат од МВР за „Макфакс“.
Откапдот за старо железо, каде што избувнал пожарот, е регистриран на фирмата АСД „Метал груп“.
Жители од околните населби утрово јавија дека освен што гледаат густ чад, се слуша и пукање од местото каде што гори.
Во гаснењето на пожарот во Шутка, покрај Бригадата за противпожарна заштита, на барање од градоначалникот на Шуто оризари, се вклучи и ер тракторот на Дирекцијата за заштита и спасување.
Центарот за управаување со кризи (ЦУК) му укажа на градоначалникот на Шуто Оризари, Курто Дудуш, доколку се процени дека има потреба, да го евакуира населението.
