За време и по велигденските празници, луѓето се склони да претеруваат со внесот на храната, а последиците од ваквата исхрана веројатно нема веднаш да станат видливи.
Посната храна е здрава, поволно влијае на кардиоваскуларниот систем, ги прочистува крвните садови, го намалува лошиот холестерол, полесно се вари. Покрај тоа, посната храна вклучува намирници богати со целулоза и оние кои го детоксицираат телото.
Во македонската православна традиција постојат неколку големи постови годишно. Постот бара специфична исхрана, така што намирниците што редовно ги консумираме, во текот на постот не ги консумираме. Станува збор за храната од животинско потекло, месото, месните преработени производи, млекото, млечните производи, мастите од животински потекло и јајцата.
Постепено преоѓање од посна на мрсна храна
Кај луѓето што постат, преминот од посна на мрсна исхрана треба да биде постепен. По престанувањето на постот, важно е да се прибегне кон воведување на сите вообичаени намирници во исхраната. По повеќенеделниот пост, најчесто доаѓа до прекумерно внесување на мрсна храна, што никако не може да биде добро за организмот, а особено за дигестивниот систем. Многу е важно веднаш да не се „фрлите“ на огромни количини храна, особено не на мрсната храна и разните теста, слатки, колачи. Важно е да знаете како да јадете по постот, за да не предизвикате стомачни проблеми, нагло скокање на нивоата на холестеролот, оптоварување на желудникот… Основата на исхраната на постот се житарките, овошјето, зеленчукот, рибата и растителните маснотии. Тоа практично значи, дека во текот на постот организмот навикнал на храна која најчесто е помалку мрсна, помалку зачинета и полесно сварлива или она што често го нарекуваме „полесна“ храна.
Здравствени проблеми поради прејадувањето
Со завршувањето на големиот пост и големиот празник, обрнете внимание исхраната по постењето да не ви нанесе здравствени штети кои ќе ги поништат здравствените користи од постот.
За време на празниците, луѓето се склони да претеруваат со внесот на храната, а последиците од ваквата исхрана веројатно нема веднаш да станат видливи, бидејќи потребно е да внесеме околу 3.500 калории повеќе за да ја зголемиме телесната маса приближно 450 грама. Меѓутоа, најмалку 40 отсто од вишокот калории доаѓаат од маснотиите, кои ги оштетуваат артериите и се таложат во масното ткиво, нагласуваат лекарите.
Гастроентеролозите предупредуваат дека луѓето обично по постот паѓаат во стапица на преобилно прејадување, бидејќи сето она од што се откажувале во текот на постот сакаат да го надоместат во деновите по постењето, а тоа може да направи проблем. Тие велат дека зад болките во стомакот, подуеноста, интезивираните гасови, лошото варење, често можат да се кријат посериозни заболувања како што се камен во жолчното ќесе, акутен напад на панкреасот, болки и напад на желудникот, па понекогаш дури и инфаркт на миокардот. Наглото внесување на животински масти може да предизвика холестеролски шок. Луѓето ризикуваат зголемување на нивото на холестерол и шеќерот во крвта што, пак, може да испровоцира мозочен или срцев удар. Ова особено се однесува за луѓето кои веќе имаат заболување на крвните садови.
Наглото консумирање храна од животинско потекло и во големи количини по постењето, може да предизвика надуеност, отеченост или болки во стомакот, мачнина, силни гасови, но и други последици. Умерената исхрана е начин да се избегнат овие здравствени проблеми, поради кои граѓаните понекогаш бараат медицинска помош.
Адаптирање од лесна во тешка храна
Во текот на адаптирањето, треба да консумирате храна која организмот може лесно да ја свари и која е богата со хранливи материи. Постепено се воведуваат и посложените јадења. На почетокот се препорачува да се воведе младо сирење во исхраната, потоа јогурт, кисело млеко и кефир. Потоа доаѓаат на ред другите млечни производи, а потоа и месото (попосните меса, како пилешко, мисиркино, телешко). Бидете скромни и кога се во прашање велигденските јајца: во текот на и по велигденските празници, знаеме да претераме со нивното јадење. И не заборавајте, и понатаму во вашата исхрана треба да биде застепено доволно количество овошје, зеленчук и житарки како и во текот на постот.
Обидете се, исто така, да ја задржите навиката на користење риба во исхраната, и тоа барем двапати неделно. Освен што ќе биде корисно за вашето здравје, ќе го олесни и периодот на адаптирање на помрсна храна.
Особено е важно и количински да не претерувате.
И по завршувањето на постот треба да се почитуваат неколку важни правила што се однесуваат на исхраната.
Јаглехидратите земајте ги од различните видови зеленчук и житарки. Мастите од нерафинираните билни масла. Количеството на прости шеќери (слатки) треба колку што е можно да се редуцира. Овошјето нека биде ваш прв избор кога ќе посакате да се засладите. Не заборавајте на водата и незасладените чаеви и природни сокови, а консумирањето алкохол треба да е умерено.
Од начинот на исхраната која личноста ја има пред започнување на постот, здравствената состојба и возраста, ќе зависи и времетраењето на периодот на прилагодување на новиот начин на исхрана со преминување на посната храна.
