Платата за месец јануари вработените во кабинетот на претседателот на државата Стево Пендаровски ќе ја добијат деновиве и тоа со 5 проценти покачување, согласно Колективниот договор. Како што информираат од кабинетот на Пендаровски, постигнат е договор со Министерството за финансии.
-Во врска со прашањата од медиумите упатени до нашата институција, ве информираме дека е најдено решение помеѓу институциите Претседател на Република Северна Македонија и Министерството за финансии за исплата на плата за претседателот и вработените во Кабинетот на претседателот за месец јануари 2023 година.
Платата ќе биде исплатена во наредните денови, во согласност со Колективниот договор и утврденото покачување од 5% за административните службеници во Кабинетот.
Постигнатото решение предвидува внатрешна прераспределба на средства во рамките на постоечкиот и одобрен буџет за 2023 година за Кабинетот.
Со ова решение целосно се почитува Колективниот договор, а уште еднаш повторуваме дека претседателот, именуваните лица и посебните советници не добиваат покачување на плати.
