До пред неколку години од фондовската каса се издвојувале околу половина милион евра за десетина пациенти, кои што годишно имале потреба да се лекуваат надвор од земјата. Лекувањето најчесто било во медицинските центри во Германија и Австрија. Денес благодарение на достапноста на туморските импланти, а сега и на кадаверичната трансплантација, на Клиниката за Ортопедски болести може целосно да се изврши отстранување на туморот, а потоа и целосна реконструкција на афектираниот екстремитет, изјавија денеска докторите од Клиниката за ортопедија каде што беше во посета министерот за здравство Венко Филипче по повод месецот на остеосарком.
Во изминатава недела беше направена промоција на реновираниот оддел А од клиниката за Ортопедски болести, кој што е наменет за пациентите кои што се лекуваат од малигни мускулоскелетни тумори и со тоа се овозможија подобри услови за лекување на пациентите.
Исходот кај пациентите со мускулоскелетни саркоми зависи од многу фактори, пред се од типот на тумор, потоа од неговата локализација, од отсуството односно присуството на метастази во моментот на поставување на дијагнозата, од возраста на пациентот и од неговата општа состојба и одговорот на туморот на терапијата. Ова е една група на тумори кај кои во моментов не постои начин како да се превенираат. Затоа главниот фокус е ставен на навремената дијагностика и третман.
Трансплантацијата наоѓа широка примена во третманот на пациентите со саркоми. Клиниката за ортопедија работела трансплантација години нанзад, но трансплантацијата од починат донор е нешто што се работи прв пат и што отвара големи можности за третман на една палета на пациенти со различни дијагнози, особено малигни.
Клиниката располага со услови за презервација на коските подолг временски период. Како терциерна здравствена установа, која што е влезена во националната програма за трансплантација во наредниот период ќе се насочиме кон прецизно таргетирање на пациентите на кои им е потребна трансплантција. Благодарение на развојот на оваа програма, голем дел од пациентите кои беа испраќани за лекување во странство веќе се лекуваат на клиниката, велат од Клиниката за ортопедија.
На Клиниката за ортопедски болести годишно се оперираат околу 150 случаи на малигни неоплазми на различни делови од мускулно скелетниот систем . Од почетокот на годинава до сега се оперирани 16 пациенти. Најголем дел од коскените саркоми се дијагностицирани кај пациенти на возраст помеѓу 10 и 20 години, односно деца и адолесценти. Процентуалната застапеност на саркомите во подоцнежна возраст е значително помала. Мекоткивните саркоми пак се најчести кај возрасната популација под 40 години и кај возрасната група помеѓу 40 и 60 години.
Години наназад оваа клиника е позната по бројните експерти кои се познати по своето знаење кое го имплементираат во клиничката пракса и хируршкиот третман на овие заболувања. На Клиниката за прв пат е извршена трансплантација на коскено ткиво кај млада пациентка. Тимот хирурзи од Клиниката за ортопедски болести успешно ја изведоа комплексната операција на замена на малигно променето коскено ткиво со здраво ткиво, рече Филипче.
Директорот на ТОАРИЛУЦ д-р Александар Трајановски истакна дека оваа година се набавени и досега имплементирани три туморски протези на колено, и ја потенцира важноста дека за прв пат тука беше изведена трансплантација на коскено ткиво.
Раководителот на Клиника за Ортопедија д-р Јахја Далипи посочи дека особено важно е дека после цели 60 години е реновиран одделот А на Клиниката се со цел да се подобрат условите за работа, потенцираше дека за разлика од порано пациентите веќе не се испраќаат на лекување во странство туку се третираат на Клиниката за ортопедски болести.
Професор д-р Милан Самарџиски, раководител на Оддел за ортопедска онкологија со коскено зглобна трансплантација, истакна дека не постои превенција за малигните заболувања, туку брзото откривање и дека раната дијагностика е од најголема важност. На клиниката за ортопедија, пристапот во лекувањето на малигните тумори на мускулноскелетниот систем е мултидисциплинарен, во него учествува тим составен од ортопедски хирурзи, онколози, патолози, радиолози и васкуларни хирурзи. Пациентите се лекуваат по стандардизирани протоколи кои што се користат секаде во светот, а третманот опфаќа примена на хемотерапија, радиотерапија и хируршки зафат, по соодветно поставената дијагноза.
Republika.mk – содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
