Полициски екипи за антитероризам се во дирекцијата на ЈСП „Скопје“ во населбата Автокоманда по дојавата од вработен во претпријатието за поставена бомба во едно од возилата. По налог на МВР, утрово сите возила на ЈСП „Скопје“ беа повлечени од сообраќај. По соодветна безбедносна проверка, автобусите постепено се вклучуваат во сообраќај.
Од ЈСП „Скопје“ информираат дека лицето вработено во нивното претпријатие, кое ја испратило заканата е приведено од страна на МВР.
-ЈСП нема да дозволи било какви уцени, закани, притисоци и обиди за саботажи да го нарушат работниот процес на претпријатието и ќе продолжи да работи во на интерес на граѓаните. Безбедноста и сигурноста на вработените во ЈСП и скопјани секогаш е приоритет на претпријатието, информираат од ЈСП „Скопје“.
МВР соопшти дека од полициски службеници е приведен Ј.И. вработен во ЈСП „Скопје“, по претходна пријава околу 5 часот од ЈСП „Скопје“.
-Ј.И. од неговиот меил на службениот меил на ЈСП „Скопје“ и на мејловите на сите директори, службите за финансии, правни и други служби во ЈСП „Скопје“ со закана дека поради нередовното земање на плата планирал да постави бомба во автобус на ЈСП, која би експлодирала денеска за време на протестите, се вели во соопштението.
Поради овие случувања, како што изјави Миќо Стојановски, претседател на Синдикатот на работниците од сообраќајот нема да се одржи закажаниот протест.
-Има цела редица автобуси кои чекаат на скенер да се проверат од екипи за антитероризам при МВР. Не е можно да се одржи пресот. Нема да бидат пуштени новинарите. Ангажирана е цела македонска полиција. Не верувам дека ќе се реализира и протестот пред Владата кој беше најавен од градоначалничката на Град Скопје, Данела Арсовска и секретарот на Град Скопје, Зоран Глигоров – истакна Стојановски.
