Секогаш ми значи мислењето на јавноста, договорот со албанкста компанија за паркингот во Клинички центар не е потпишан и може да се поништи, рече денес министерот за здравство Арбен Таравари на промовирањето на обновениот кат на Инфективна клиника. Службите го известиле дека процедурата во Министерството е помината, но следи фаза во која компанијата треба да помине филтри во Владата.
„Сега има уште одредени филтри што треба да поминат низ Владата, ако поминат океј, ако не поминат пак ќе го објавиме конкурсот. Не е потпишано. Ако на јавноста не и се допаѓа, јас сум за тоа да не го потпишам. Мислам дека на Клинички центар паркингот причинува огромна нервоза. Секогаш многу ми значи што ќе слушнам од јавноста. Ако ми кажат дека не е во ред нешто, пуштено е и во Владата ако и таму ми кажат дека има одредени пропусти, немаме ништо. Ќе го поништиме, ќе го објавиме пак само ќе изгубиме една година време“ рече министерот Таравари.
Во документацијата била дефинирана и цената на паркирање, а Таравари уверува дека албанската компанија нема да го добие паркингот на 20 години, како што стои во физибилити студијата тука на најмногу 10 оти уште толку време министерот очекува Клинички центар да остане на таа локација. Токму кусиот период за стопанисување со паркингот Таравари смета дека бил причина што се пријавила само една фирма.
„Цените се 50 денари. Во Рамстор е 60 денари. Тука имавме паркирање на автомобили, ги оставаа тука и после излегуваа во град. 50 денари јас мислам дека е пристојна цена за оваа територија. Еве пред Нова Македонија е 40 денари за граѓани. 50 денари не е цена која е многу висока. Мислам дека цената не е лоша. Најдобро е 0 денари да биде, меѓутоа ако има таков понудувач да изгради плус 600 паркинг места, би било идеално. Имаше аукција, тоа е цената што е дадена“, вели министерот Таравари.
Изградба на катни гаражи во Клинички центар и решавање на паркирањето беше изборно ветување на секоја нова власт изминативе две децении, но место решение пациентите со секоја нова смена на власта плаќаат се поскап паркинг.
