Основното јавно обвинителство за гонење на организиран криминал и корупција соопшти дека поднеле обвинение против четири лица за набавката на 202 кинески двокатни автобуси. Како што велат од таму, тие се теретат дека ја искористиле својата службена положба и овластување, спротивно на Законот за јавни набавки, го фаворизирале операторот од Кина, а со тоа како што велат од обвинителството прибавиле корист за економскиот оператор и го оштетиле буџетот на државата за 4.772.920 евра.
-Имено, по три неуспешни постапки за набавка на двокатни автобуси што биле спроведени во текот на 2008 и 2009 година, во месец февруари 2010 година била спроведена нова постапка за јавна набавка. При отварање и разгледување на понудите доставени по јавниот оглас за набавка на 200 автобуси од затворен тип и два автобуси од отворен тип, обвинетите С.Ф.П. (47) како претседател и И.Ј.(36) и Ј.Ј.А.(62) како членови на Комисијата за спроведување на јавна набавка на двокатни автобуси за ЈСП на Град Скопје, во договор со првообвинетиот М.Ј.(43), постапиле спротивно на Законот за јавни набавки и фаворизирале економски оператор кој до денот на отварањето на понудите немал доставено банкарска гаранција на понудата и сертификат за квалитет ИСО 9001:2000 како што било пропишано во тендерската документација. Комисијата наместо да ја отфрли понудата како некомплетна, ја продолжила постапката и извршила евалуација на двете доставени понуди. И покрај тоа што понудата на економскиот оператор од Р.Бугарија била за 4.772.920 евра пониска, Комисијата го избрала економскиот оператор од Кина и му предложила на првообвинетиот да склучи договор со него.
Првообвинетиот иако знаел за недостатоците на избраната понуда, наместо да ја поништи постапката за јавна набавка поради битни пропусти, тој донел Решение за избор на најповолна понуда и склучил Договор за купопродажба на автобуси на износ од 35.425.410,00 евра. Со дејствијата опишани во Обвинителниот акт обвинетите сториле кривично дело Злоупотреба на службена положба и овластување предвидени и казниво по член 353 став 5 во врска со став 1 и член 22 од Кривичниот законик., се вели во соопштението на Обвинителството за гонење на организиран криминал и корупција.
Како што е познато, двокатните кинески автобуси беа набавени уште во владата на ВМРО-ДПМНЕ предводена од Никола Груевски. Првата пратка на овие автобуси пристигна во август 2011 година.
