Венчаницата на принцезата Дајана ќе биде изложена во палатата Кенсингтон, откако нејзините синови, принцот Вилијам и принцот Хари, се согласиле да го „позајмат“ легендарниот и незаборавен фустан.
Дајана на венчавката со принцот Чарлс во катедралата Сент Пол во 1981 година го носеше гламурозниот невестински фустан, кој беше украсен со превез од дури 7,5 метри.
Јавноста од јуни годинава ќе има можност да ја види венчаницата на покојната принцеза Дајана во кралската резиденција во западен Лондон.
Фустанот, дизајниран од Елизабет и Дејвид Емануел, е украсен со светки и бисери и чипка кои првично ѝ припаѓале на кралицата Мери.
Нежно заобленото деколте и големите надуени ракави ги красат раскошни машни од тафт – стил популаризиран од принцезата во раните 1980-ти. Фустанот е во сопственост на синовите на Дајана, принцовите Вилијам и Хари, кои во оваа прилика го „позајмија“ за изложба.
Насловена како „Royal Style in the Making“ овој настан ќе се осврне на темата за односот помеѓу дизајнерите и нивните кралски клиенти.
На изложбата ќе има и ретка ткаенина која е зачувана од 1937 година и била искористена за да се направи фустан за крунисување на кралицата Елизабета Втора.
Модните комбинации на Дајана биле внимателно следени и документирани, и пред и по нејзиниот брак со Чарлс.
Модните избори и додатоци на Дајана и денес се актуелни, па во март Меган, војвотката од Сасекс, носеше нараквица од Дајана за време на разговор со Опра Винфри, пишува „Си-Ен-Ен“.
