Најмалку четири лица загинаа во снежната бура Филомена во Шпанија, а сообраќајот е парализиран во некои делови на земјата.
Војската и спасувачките служби извлекоа 1.500 луѓе од автомобилите што останаа завеани на патиштата.
Маж и жена се удавија во река кога автомобилот им потонал во надојдената вода во близина на Малага, додека на истокот од земјата бездомник почина од смрзнување. Четвртата жртва е пронајдена во Мадрид, под големо количество снег.
Министерот за внатрешни работи Фернандо Гранде-Марласка ги повика граѓаните да не ги напуштаат своите домови без потреба.
– Се соочуваме со најсилното невреме во последните 50 години, рече тој.
Снегот парализира повеќе од 650 патишта, а некои возачи се завеани во автомобилите.
Училиштата и универзитетите во Мадрид ќе бидат затворени до среда, а аеродромот не е отворен од синоќа. Најмалку 50 летови се откажани.
Одложени се и фудбалските натпревари, вклучувајќи го и денешното дерби Примера Атлетико Мадрид – Атлетик Билбао.
Мадрид е погоден од најсилната снежна бура од 1971 година, соопшти метеоролошката агенција.
Во главниот град на Шпанија падна снег меѓу 25 и 50 сантиметри.(МИА)
