Тајландската морнарица го испраќа носачот на авиони „Чакри Нарубет“ со залихи и медицински тимови на југот од земјата, кој е погоден од она што се проценува дека е најлошата поплава во последните 15 години.
Поплавите беа предизвикани од обилни дождови и погодија девет тајландски провинции, додека соседните области во Малезија беа исто така погодени, со повеќе од 18.500 евакуирани, објави Ројтерс.
Носач на авиони и флотила од 14 бродови придружени од хеликоптери ќе можат да обезбедат до 3.000 оброци дневно, а тој може да служи и како пловечка болница.
Проценките велат дека околу 1,9 милиони луѓе биле погодени во Тајланд, додека во Хат Џаи, еден од најтешко погодените градови, водите достигнале висина до два метра.
Спасувачите ги евакуираа жителите, вклучително и постарите лица, додека метеоролошките служби предупредуваат на понатамошни силни бури и бранови до три метри.
Поплавите ја загрозуваат и гумената индустрија во Тајланд, која, како што истакнуваат медиумите, е еден од најголемите производители во светот.
Властите апелираат за евакуација и обезбедување максимална поддршка, додека граѓаните апелираат за помош преку социјалните мрежи, велејќи дека се заробени во своите домови без храна или вода за пиење.
Фото: принтскрин
Текстот Најлоши поплави во последните 15 години: Тајланд испраќа носач на авиони како пловечка болница е превземен од МАКФАКС.
