Бугарија очекува праведна одлука од судот и отфрлање на неоснованите обвинувања против Љупчо Ѓоргиевски. Сепак, оваа правда, за жал, нема да ги избрише последните години на огромен стрес и нарушен личен живот на македонскиот Бугарин. Ова е наведено во соопштението на Министерството за надворешни работи (МНР) на Бугарија по предметот против Ѓоргиевски, пренесува Трибуна.
Суштината на институционалниот притисок не е само крајниот резултат, туку и неповратните последици од целиот процес на неговата примена. Како и досега, МНР ќе продолжи да инсистира, вклучително и преку ангажирање на своите партнери од Европската Унија (ЕУ), да се прекине овој притисок врз бугарската заедница во Северна Македонија.
Бугарските институции остануваат непоколебливо ангажирани во своите доследни напори за заштита на правата на македонските Бугари, вклучително и на г. Љупчо Ѓоргиевски, дополнуваат од Министерството за надворешни работи на Р. Бугарија.
Во ставот се потсетува дека на 21 мај во Основниот суд – Битола се одржало последното рочиште по предметот против еден од најпрепознатливите претставници на бугарската заедница во Северна Македонија, г. Љупчо Ѓоргиевски, а пресудата се очекува во наредните денови.
МНР внимателно го следи развојот на процесот уште од самиот почеток пред повеќе од две години, додаваат од институцијата. Постојано се ангажирани и Амбасадата на Р. Бугарија во Скопје и Генералниот конзулат во Битола, вклучително со присуство на амбасадорот, генералниот конзул и конзули од двете претставништва на рочиштето од 21 мај.
На властите во Скопје повеќепати им било укажано дека за Бугарија овој предмет е значаен во однос на нивната подготвеност да го гарантираат еднаквото третирање на Бугарите и да ги адресираат проблемите со кои тие се соочуваат.
Оваа позиција јасно ја изразил и бугарскиот министер за надворешни работи Георг Георгиев на средби со неговиот колега од Северна Македонија. Со карактерот на обвинувањата во предметот против г. Љ. Ѓоргиевски се запознаени и дипломатските мисии на земјите-членки на ЕУ во Скопје. МНР ќе продолжи да ги информира своите партнери за состојбата на Бугарите во Северна Македонија и да го ангажира меѓународниот фактор во нивната борба за еднакви права, се наведува понатаму во соопштението.
Предметот против Љупчо Ѓоргиевски, претседател на здружението Културен центар „Иван Михајлов“ во Битола, кое беше избришано од Централниот регистар на Северна Македонија, беше покренат по поднесени пријави од Комисијата за спречување и заштита од дискриминација, партијата Левица и Сојузот на борците во Битола. Тој започна во јули 2023 година.
Ѓоргиевски е обвинет за поттикнување расна и етничка омраза и ксенофобија поради објавување на цитати од Иван Михајлов на Фејсбук-страницата на здружението Културен центар „Иван Михајлов“.
Сведочење во постапката вчера даде и поранешниот премиер на Република Северна Македонија Љубчо Георгиевски.
