Фолклорна куќа – музеј „Грнацкине конаци“ гради 25-годишниот родопчанин Филип Синапов. Куќата е заоснована на архитектонскиот модел на родната куќа на неговиот прадедо Калекан Кехаја од селото Грнати, општина Неделино, јавува БТА, пренесува Трибуна.
Тој има намера да изгради музеј со музичко училиште и работилница за три занаети. Куќата ќе обединува се што е фолклор – музика, занаети, традиции, живот и култура.
Идејата на младиот човек е да ги обнови, зачува и покаже традициите и обичаите од минатото. Затоа сака куќата да биде автентична. Таа е во карактеристичниот стил на Родопите, па дури и покривот ѝ е од тикли (камени плочи).
„Тоа беше предизвик бидејќи тиклите (камените плочи) не можат да се најдат лесно. Ги добив од стара урнатина, а мајсторите што ги поставија беа постари и мило ми е што успеав да ги убедам“, вели Филип.
„Мојата желба е да ги пренесам моите вештини, бидејќи се губат, на пример, пред неполни три месеци ја изгубив прабаба ми, која почина на 93 години. Нејзините традиции, приказни и особено ткаење целосно ми ги предаде таа и за должност го земам ова знаење да им го пренесам и на другите“, вели родопчанецот.
Намерите на Филип се посетителите на куќата-музеј да го допрат целиот процес на создавање во областа на ткаењето, терзијството и абаџијството. Затоа, изградената зграда е само дел од неговиот проект. Околу неа ќе има штала, нива, рж, гумно и бавча.
„Тука пченицата ќе биде на нива, ќе видите како се жнее, како се прават снопови, како потоа се меле на рачна воденица, како се просејува брашното и како се пече лебот во фурна, објаснува Филип.
Младиот човек е сам во таа своја идеја. За да ја оствари, ги вложил сите свои заштеди а подигнал и кредит.
Покрај трите занаетчиски работилници, во фолклорната куќа-музеј ќе има и изложба на типичните во минатото одаи. Активностите во музејот младиот човек ќе ги извршува сам, а по потреба ќе се потпира и на помош од колегите.
За изградбата на музејот, младиот човек досега потрошил околу 100 илјади евра – сопствени средства и средства од банкарски кредит.
Самата куќа ги обединува моите професии – професор по музика, пејач, музички уредник, а водам и емисија на Радио Крџали“, вели Филип Синапов за Нова ТВ.
