– Четири недели Ковачевски имаше можност да избере меѓу двете наши понуди, но од денеска тие веќе не важат и има само една опција – предвремени парламентарни избори, соопшти претседателот на ВМРО-ДПМНЕ Христијан Мицкоски.
Во вечерашното интервју на Канал 5, тој рече дека не само што власта и опозицијата не преговараат, туку и се многу далеку од преговори.
-Нашата позиција е јасна, ние играме со отворен гард. Двете опции што ги понудив на лидерската средба беа на маса до овој момент, но се уште не слушнав од Ковачевски која опција ја прифаќа, првата или втората. Од денеска има само една опција на маса – предвремени парламентарни избори, истакна Мицкоски.
Според него, можно е сценарио ВМРО-ДПМНЕ да има 61 пратеник, а последната опција е коалиција со ДУИ, особено со актуелното раководство на оваа партија.
-ВМРО-ДПМНЕ има јасен став дека последната варијатна за соработка е ДУИ, посебно со ова раководство на ДУИ и се ќе направиме иднината Влада да биде без ДУИ и тука нема дилема, подвлече Мицкоски.
Тој нагласи и дека условувањето за ЕУ е бугарски диктат, а нема подобро од тоа, како што истакна, земјава да почне преговори со зачуван идентитет.
-Нема да прифатиме ваков диктат. Сакаме процес за ЕУ што ќе почне и ќе заврши. Подготвени сме да разговараме за се, но имаме свои правила за овој народ и оваа држава, рече Мицкоски.
Тој е убеден, како што нагласи, дека нема да се случи пратеници од ВМРО-ДПМНЕ да гласаат за уставните измени.
Може да седнеме да разговараме за дата на предвремени избори час поскоро, дури и предложивме измени во Изборниот законик – да не важи техничката влада за предвремени избори. Според ДИК, потребни се околу 55 дена, подготвени сме да го забрзаме тој процес.
ВМРО-ДПМНЕ, како што посочи, е против измените на законите за родова еднаквост и за матичната евиденција и го поддржува собирот на МПЦ-ОА што се одржа вечерва во Скопје.
