Претседателот на ВМРО-ДПМНЕ Христијан Мицкоски од митингот во Ресен каде што ја бара поддршката од граѓаните за кандидатот Јован Тозиевски, му одговори на премиерот Зоран Заев дека никогаш нема да има предавнички и квислиншки став за важните македонски прашања како него.
Мицкоски истакна дека на лидерска средби во Клубот на пратеници, во присуство и на потпретседателот Александар Николоски, Заев ги убедувал дека треба да се прифатат понижувањата кои им се нудат на македонскиот народ и на македонските граѓани и да прифатат да се направат промени.
„А тој имаше таков став кога седевме во Клубот на пратеници. Тука е уште еден присутен од тој состанок, потпретседателот Александар Николоски. Кога беше таа лидерска средба, кога нè убедуваше дека треба да се понижиме, дека треба да се погазиме како народ, како граѓани, како луѓе и да го промениме тоа што ни го оставиле нашите предци, кои што тоа пак, со крв го платиле. И тогаш го гледав во очи, како и денеска и тогаш му реков, свесен ли си што правиш? Сега можеби сите они кои што ти доаѓаат, те потапнуваат по рамото и ти изразуваат поддршка, во еден момент ќе ги снема, ама штетат која што ќе ја направиш. Јас сум свесен дека ние сите заедно, против целиот тој свет собран околу тебе не можеме толку силно да се спротивставиме, и ти тоа ќе го направиш? Дали си свесен дека таа грешка ќе не кошта нас многу понатаму, а ништо нема да добиеме за возврат. Погледна во очи, збунет каков што отсекогаш бил и така и денеска, и одговори: Да свесен сум! Е па јас, таков став никогаш нема да поддржам, нема никогаш да поддржам“, дециден беше Мицкоски.
