Денес, првиот заменик-претседател на Владата и министер за животна средина и просторно планирање, Изет Меџити, оствари прва средба со новата постојана координаторка на ООН, Рита Колумбија.
Теми на состанокот беа двете претстојни конференции на страните на конвенциите за биолошка разновидност и за климатски промени, како и други прашања од заеднички интерес, за кои министерот Меџити информира за текот на подготвителните и за активностите што претстојат.
Министерот Меџити се заблагодари за досегашната соработка, а постојаната координаторка Колумбија ја потврди подготвеноста на имплементирачките агенции на ООН за уште поголема вклученост во спроведувањето на политиките за здрава животна средина. Таа ја нагласи приоритетноста на областа од аспект на идниот рамковен договор за соработка со Владата на Република Северна Македонија за периодот 2026 – 2030.
Двете страни се сложија за потребата од синхронизиран пристап во програмирањето на програмите на ООН со националните приоритети за повеќе димензионалност на проблематиката и потребата од интегрирање на политиките за здрава животна средина во другите секторски политики, со цел намалување на негативното влијание од климатските промени и влијанието врз биолошката разновидност.
Постојанaта координаторка на ООН, Колумбија, во неколку наврати ги потенцира тимската работа, искуството и знаењето како препознаена вредност на Министерството.
