Најдобриот македонски ракометар, Кире Лазаров е вистинска движечка сила на репрезентацијата. Во улога на селектор и играч ја однесе Македонија на ЕП со само еден пораз, оној од Данска на гостински терен. Сите други мечеви ги добивме, вклучувајќи го и вечерашниот против Швајцарија иако претходно пласманот на ЕП беше обезбеден. Ракометарите сакаа радост да подарат на нацијата на овој голем празничен ден и успеаја во тоа.
-Дуелот со Швајцарија беше доста тежок, имавме доста сомнежи, но драго ми е што останавме чесни пред нас, пред семејствата, нацијата, пред Бог… покажавме карактер, одигравме доста квалитетен меч. И претходно кажав дека Швајцарија е екстра-квалитетна репрезентација, им направи на сите големи проблеми на ЕП. Успеавме да одиграме квалитетно, направивме два-три чекори напред, ама имаме уште можност да напредувавме, изјави Лазаров по мечот.
Црвено-жолтите“ до победата ги предводеа селекторот Кирил Лазаров и Филип Кузмановски со по шест гола, како и голманот Никола Митревски со 15 одбрани.
На другиот меч од 6. коло во седмата група, Данска ја победи Финска 46:24.
Македонскиот национален тим го обезбеди своето седмо учество на континенталните ракометни собири каде од групата ќе патуваат и Данците.
Европското првенство ќе се игра во јануари следната година во Словачка и во Унгарија
