„Бугарија многу ја цени вашата ангажираност, вашата посветеност кон работите на Унијата. Ја гледаме вашата амбиција и начините на кои што ја организирате работата на Советот. За мене е чест да работиме заедно. Во лицето на нашата влада, имате вистински партнер за просперитетот на Унијата и за застапувањето на нашите демократски вредности“.
Ова го изјави премиерот Росен Желјазков на заедничкиот брифинг со претседателот на Европскиот совет Антонио Коста, јавува БГНЕС, пренесува Трибуна.
„Денес, кога ЕУ е соочена со нови геополитички и економски предизвици, важно е да го задржиме нашето единство. Бугарија ќе продолжи да биде конструктивен и сигурен партнер во постигнувањето на целите на Унијата. Бугарија има што да даде“, нагласи Желјазков.
Тој посочи дека ЕУ поседува уникатна комбинација – пазарна економија, слободен пазар, социјална ангажираност и владеење на правото. „Фактот дека толку многу земји, и во нашето соседство, но и подалеку, се стремат кон ЕУ, е доказ за тоа“, додаде бугарскиот премиер.
Од своја страна, Антонио Коста изјави дека разменил мислења со Желјазков за тековната геополитичка ситуација и клучната улога на Бугарија во ЕУ. „Имам можност да ве посетам во многу важен момент, кога Бугарија конкретизира многу важно достигнување во проширувањето на Шенген и продолжувањето на процесот за прифаќање на еврото, се надевам во следните месеци“, рече тој.
Според него, е исклучително важно во овој сојуз на разноликост органите на власта да бидат блиску до општеството и до граѓаните. „Сега ќе имам можност да ја разгледам Бугарија, регионот на Стара Загора, да разговарам со професорите и студентите на Тракискиот универзитет за диверзификацијата на бугарската економија. Исто така, ќе ја посетам фабриката „Арсенал“ во Казанлик“, додаде тој и нагласи: „Бугарската одбранбена индустрија игра многу важна улога не само за Украина, туку може да игра одлучувачка улога и за иднината на европската одбрана“.
Во однос на проблемите со безбедноста, Коста рече дека безбедноста на Европа започнува од Украина. Според него, безбедноста на Европа и безбедноста на Украина не можат да се одделат. „Донесовме одлука значително да ги зголемиме нашите инвестиции во нашата одбрана, бидејќи ние сме проект за мир. Мирот без одбрана е илузија. Ни требаат инвестиции во одбрана. Но, да инвестираме повеќе во одбрана значи да инвестираме повеќе во нашата економија“, додаде тој.
Коста истакна дека конкурентноста е основен приоритет за зајакнување на економијата, создавање нови работни места и нови можности за идните генерации. Треба заедно да можеме да го управуваме преминот кон зелена економија и во борбата против климатските промени, додаде тој.
Коста нагласи дека 27-те земји-членки треба да работат рамо до рамо за да се соочат со предизвиците.
Тој коментираше и напредокот на Бугарија на патот кон усвојувањето на еврото.
„Приклучувањето кон еврозоната се заснова на објективни критериуми. До сега, сите се импресионирани од значителниот напредок што Бугарија го постигна во исполнувањето на критериумите за еврото. Очекуваме последните два извештаи-оценки од ЕК и ЕЦБ во јуни и се надевам дека оценката ќе биде позитивна. Ако е така, ќе можеме да донесеме позитивна одлука на Европскиот совет во јуни“, рече Коста.
Тој се осврна и на проширувањето на Европската Унија со земјите од Западниот Балкан и посебно на РС Македонија, која во моментов не може да започне преговори за членство бидејќи одбива да ги исполни условите на „Францускиот предлог“.
„Проширувањето на Западниот Балкан, како и кон Украина и Молдавија, се најважните геополитички инвестиции на ЕУ, ова е континуиран процес. Последното претседателство на Бугарија вложи многу енергија во овој процес“, истакна Коста.
Тој рече дека ќе продолжиме да работиме со различните земји и со РСМ. Коста ќе го посети регионот за две недели – сите шест земји од Западниот Балкан, каде ќе разговара со нивните лидери за да „продолжиме да го движиме овој процес“. Ангажирани сме за успехот на ова проширување, додаде тој.
