Верните навивачи на најтрофејниот фудбалски клуб во Македонија, „Комити“, ја продолжуваат борбата за спас на Вардар по откажувањето на Сергеј Самсоненко да го финансира клубот.
Навивачите на „црвено-црните“ имале средба со градоначникот на Скопје, Петре Шилегов со кого разговарале за решенијата за спас на клубот и се надеваат дека наскоро конечно ќе се решат сите проблемите и Вардар одново ќе се врати на позицијата која ја заслужува во македонскиот фудбал .
Соопштението на „Комитите“ ви го пренесуваме во целост:
„Како дел од нашите активности кои имаат за цел олеснување при пронаоѓањето решение за Фудбалскиот Клуб Вардар, вчера имавме средба со Градоначалникот на Град Скопје. Градот Скопје е основач, мнозински сопственик и патрон на Вардар, па по приложената оставка на сегашното раководство, ќе следи примопредавање на клубот назад кај сопственикот.
За до тоа да дојде потребно е актуелниот времен сопственик на ФК Вардар, Сергеј Самсоненко да приложи гаранции во противвредност на долговите кои се направени за време на нивното раководење, како Вардар би бил во чиста состојба, и во таква состојба да биде предаден на нов инвеститор. Веруваме дека до тоа ќе дојде во деновиве кои следат затоа што препознаваме расположение од сите страни.
Добивме уверување дека ќе вложат максимални напори клубот да биде поставен на местото кое го заслужува во Македонскиот фудбал и општество, како и тоа дека во догледно време ќе изградиме тим достоен да ја претставува Македонија на Европска сцена.
Доколку веќе не стравуваме толку на стратешки план за иднината на нашата љубов, сепак постојат итни чекори кои треба да се направат со цел да се избегне непосакувано сценарио и да загубиме драгоцено време. Итните чекори се однесуваат пред се кон обезбедување на финансиска конструкција за играчкиот кадар, носење евентуални засилувања, подготовки и назначување на времено раководство, како би го дочекале подготвени пролетниот дел од сезоната.
Добивме впечаток дека постои волја работите да тргнат во вистинска насока, и дека Вардар нема да ги доживува моментите од пред 10-тина години.
Остануваме посветени до крај и ќе ги вложиме нашите ресурси и влијание до доаѓањето на решението, кое сега изгледа на дофат. Се надеваме дека наскоро ќе бидеме покрај Вардар во тешките битки и предизвици кои ни претстојат, ним на теренот, но и конечно нам на трибините. Вардар ќе живее !!!“.
