Комисијата за спречување и заштита од дискриминација на Република Северна Македонија ќе изврши претрес во Бугарскиот културен центар „Иван Михајлов“ во Битола, јавува БГНЕС, пренесува Трибуна.
Во него се вели дека на 04.08.2022 година во 12:00 часот ќе се изврши увид во просториите на Центарот за култура и се предупредува дека мора да им се овозможи пристап на службениците.
Во писмото се прецизира дека според Законот за спречување и заштита од дискриминација, Комисијата може да изврши преглед на документацијата и просториите, како и да бара и собира копии од документи поврзани со конкретен случај и дискриминаторски практики, почитувајќи го правото на приватноста.
БГНЕС потсетува дека отворањето на бугарскиот културен центар „Иван Михајлов“ во Битола во април предизвика бран на огорченост кај македонската политичка елита, која ја обвини Бугарија за провокација поради несоодветниот избор на името на клубот. Од страна на голем број политичари и претставници на јавноста дури имаше повици за суспензија на Договорот за добрососедство и соработка.
Претседателот на Владата на Република Северна Македонија, Димитар Ковачевски, на 21 април, само една недела по отворањето на центарот, изјави дека во најкраток рок ќе бидат познати чекорите кои евентуално ќе се преземат во врска со регистрацијата на граѓанското здружение „Ванчо Михајлов“ и отворањето на културниот центар со тоа име во Битола.
Пред тоа ќе се разгледаат сите аспекти по ова прашање, по што ќе се донесе одлука за понатамошно постапување.
Според него, настанот за отворање на овој центар бил „повеќе од провокација, бидејќи ги разбудил духовите на минатото, бидејќи се работи за лице кое било соработник и на Хитлерова Германија и на Италија на Мусолини, како и на Независната Хрватска држава на [Анте] Павелиќ“.
Неколку месеци подоцна, во раните утрински часови на 4-ти јуни, пејачот Ламбе Алабаковски ја запали влезната врата на бугарскиот клуб „Иван Михајлов“.
Тој беше уапсен неколку дена подоцна, откако сам се предаде во битолската полициска станица, но брзо потоа беше ослободен.
За време на антиевропските и антибугарските протести на почетокот на овој месец, меѓу главните говорници беше Алабаковски. Демонстративно ги запали „Договорот со Бугарија, Договорот од Преспа и францускиот предлог“, кои според него биле еднакви на фашизам.
