Градоначалникот Орце Ѓорѓиевски заедно со премиерот Христијан Мицкоски, заменик-министерот за социјална политика, демографија и млади, Ѓоко Велковски, и директорот на ЈДГ „8 Март“, Силвана Савовска, денес поставија камен-темелник на нова градинка во населбата Расадник со капацитет за 120 деца.
Со изградбата на оваа и завршувањето на објектот „Верверичка“ и градинката во Потстаница, чија изградба е во процес, Кисела Вода целосно ги затвора листите за чекање за упис во градинка, а ќе може да прими и деца од други општини.
„Денес е значаен ден за нашата општина. Со огромна гордост и задоволство го означуваме почетокот на изградбата на новата детска градинка, тука, во Расадник, која ќе може да прими 120 дечиња. Меѓу нив, ќе има место и за најмладите бидејќи објектот, кој ќе се протега на површина од 795 квадратни метри, со 6 занимални, од кои две се за јасли, значи исполнување едно огромно барање на жителите на Расадник. Вредноста на овој капитален проект е 35 милиони денари. Она што сакам да го нагласам е дека со завршувањето на изградбата на овој објект, листите на чекање во градинката ‘8 Март4 целосно ги затвораме. Истовремено, ќе потсетам дека од почетокот на мојот мандат, со наследена листа на чекање со 450 деца, во изминатите три години вложивме во отворање две нови детски градини и проширување на капацитетите и обнова на дури седум други објекти. Со тоа, во општина Кисела Вода, сега за упис чекаат само 40-ина деца. Во моментот во завршна фаза е изградбата на градинката ‘Верверичка’, во близина на општинската зграда, а веќе сме во процес и за изградба на нова градинка во населбата Потстаница. Со завршувањето на овие објекти, вклучително и денешниот, нема само да ги елиминираме листите на чекање, туку ќе обезбедиме поголем простор, комфор и подобри услови за децата од Кисела Вода, а ќе имаме можност да примаме и дечиња од други општини. Сакам искрено да им се заблагодарам на Владата на Република Македонија и на премиерот Христијан Мицкоски за инвестициите и заложбите во сите сфери на општественото живеење, кои и на локално ниво значат огромен напредок за секоја заедница. Ова е потврда дека само со заеднички напори можеме да постигнеме трајни резултати“, истакна градоначалникот Орце Ѓорѓиевски упатувајќи благодарност и надеж за успешна соработка и со Министерството за труд и социјална политика и со министерот Лимани и заменик-министерот за социјална политика, демографија и млади, Ѓоко Велковски, со кои рече дека силно верува оти делат заедничка благородна цел – со иста посветеност да создаваат услови за посреќно и безгрижно детство на нашите најмлади.
Претседателот на Владата Христијан Мицкоски му честита на градоначалникот Орце Ѓорѓиевски за посветената и неуморна работа што ја прави секојдневно во Кисела Вода, како и на сите советници, пратеници, директори, административни служби, кои се дел од големите проекти во интерес на граѓаните. Најави нов инвестициски бран во општините, кој ќе се одвива во февруари.
„Проектите, како оваа градинка, се прават за најмладите, за оние на кои им е потребно, своите најрани години да ги поминуваат во објекти каков што е овој. Тој според рокот ќе биде готов за две години, но убеден сум дека ќе биде и порано. Ние продолжуваме да инвестираме на целата територија на Македонија. Продолжуваме и понатаму како Влада преку оној проект за децентрализација, од буџетски средства кон општините, да инвестираме на целата територија на Македонија. Веќе неколку проекти во Кисела Вода се потпишани во овој прв бран, сега во февруари ќе има уште еден втор бран проекти, кои ќе бидат потпишани, и на тој начин ја заокружуваме онаа инвестициска активност за оваа и за 2025 година по што веќе почнуваме да правиме планови за 2026 година. Импресионира посветеноста на градоначалниците, чекор што го поздравувам и ги повикувам и понатаму да бидат дел од проектите што ќе ги финансира Владата“, изјави Мицкоски.
