Градоначалникот на Тетово, Биљал Касами денеска информира дека како општина се уште се обидуваат да најдат начин како тие што земале плати, а не оделе на работа да ги враќаат парите. Вели дека долгот на општината почнува да се намалува, но тоа не го образложи со бројки на денешната средба со новинарите по повод 100 дена од неговото работење како прв човек на локалната самоуправа.
-Некои што не доаѓаат на работа се преземаат соодветени дисциплински мерки. Тие што биле ангажирани со договор на дело веќе сме во фаза на процесирање на информациите од финансиски аспект затоа што има друга компликација таму. Во сметководството не се евидентирани договорите на дело, во сметководство плаќањата се евидентирани како трошок. Ние треба да „копаме“ во финансии за да најдеме информации во текот на 2021 колку се платени по секое лице за да официјално побараме од нив да ги вратат парите. Ако во определен рок не ги вратат парите тогаш ќе се констатира конкретната сума на оштета на буџетот за која ние ќе покренеме постапка преку институциите, посочи градоначалникот Касами.
Според него, каматите се причина за промена на износот кај долговите за кои постојат решенија за наплата од извршители.
-Според нашите проценки долгот е намален, но не може да кажеме и да дадеме конкретни и прецизни цифри затоа што според информациите кои веќе се објавени над седум милиони евра е долг кои се со извршни решенија. Според законите од моментот на реализација на тие извршни налози се докалкулира затезна камата. А тоа може да се види до моментот само кога ние целосно ќе ги реализираме тие извршни решенија колку ќе биде дополнителниот долг создаден од затезните камати, објаснуваше Касами.
Тој истакна и дека со дел од доверителите се во фаза на договорање на одложено плаќање, но и тужење на суд.
-Делот од тие земаат по извршните налози. Од оваа сума (седум милиони) веќе милион евра ни се земани од сметката, а дел од тие се и према некои налози кои за нас не се прифатливи и се оптужени. Сме во фаза на оптужување, поконкретно за дел овие обврски кои се поврзани со експропријација на едно земјиште кое е од многу поодамна и според нашите информации, одлуките не се согласно законите и веќе почнавме да постапуваме и да бараме одговорност. За овој дел ќе видиме како ќе бидат конечни судски одлуки, потенцира Касами.
На новинарско прашање зошто се отстранети голем број нови сообраќајни знаци за еднонасочни улици, Касами одговори дека тоа е направено по налог на полицијата.
-Формално правно СВР интервенираше затоа што претходно немало дозвола од нивна страна, а одлука на Советот има. Ние пуштивме барање и уште немаме одговор, изјави Касами.
Во однос на улица „Страшо Пинџур“ каде со месеци се чека завршување на реконструкцијата, Касами информира дека е во процедура тендерот за канализација и за вода. Објасни дека кога ќе се завршат тие процедури, ќе се реализираат и градежните работи, а процени дека до почеток на летото ќе се завршат работите.
