Сабота е ден за размислување во Бугарија за време на кое е забрането агитирање. За 240 места во новиот состав на бугарски парламент ќе се борат 6.895 кандидати од 30 партии и коалиции регистрирани за учество на изборите, јави дописникот на МИА од Софија.
Ова се први избори во Бугарија што се одржуваат во услови на пандемија Ковид-19, а предизборната кампања се водеше онлајн преку телевизиските студија.
Според последните проучувања на јавното мислење во Бугарија, владејачката партија на премиерот Бојко Борисов – ГЕРБ води пред најголемата опозициска партија БСП со 7 до 8,5 проценти соодветно ГЕРБ (27-28%) и БСП (19-20%). ГЕРБ според сите испитувања ќе биде првата политичка партија во новиот бугарски парламент.
Според повеќето аналитичари избирачката активност во Бугарија ќе одреди дали десницата или левицата ќе има повеќе пратеници во следниот парламент. Ако околу 45% од гласачите излезат утре на гласање во Бугарија, тоа ќе им помогне на ГЕРБ и нејзините потенцијални партнери да останат на власт, но ако надмине 51%, можно е опозицијата да се обиде да формира нова влада. Стравот од Ковид може да го спречи постарите гласачи да гласаат.
Меѓу 6 и 8 партии би влегле во новиот бугарски парламент, што би го направил шарен, а во исто време и потешко и нестабилно формирање на идното владејачко мнозинство.
На политичката сцена во Бугарија се појавија партиите и коалициите кои летото 2021 година учествуваа во протестите против власта на ГЕРБ.
Според истражувањата, новата опозициска група со најдобри перформанси е „Има таков народ“ на телевизискиот водител и шоуменот Слави Трифонов, која може да земе 12,5% и да го престигне Движењето за права и слободи, кое отсекогаш било трета политичка сила во бугарскиот парламент. Партијата „Исправи се! Мутри надвор!“ на поранешниот народен правобранител Маја Манолова би добила 6,3%, додека партијата на поранешниот министер за правда Христо Иванов „Демократска Бугарија“ може да освои 6,5%. Според повеќето анкети на јавното мислење, ВМРО на Красимир Каракачанов го преминува изборниот праг и ќе влезе во новото Бугарско национално собрание со од 4% до 4,4%.
Но, според социологот Евелина Славкова од агенцијата Тренд, најголемите изненадувања се очекуваат по парламентарните избори во Бугарија, кога ќе стане јасен бројот на пратеници од секоја партија и коалиција.
