Луѓето кои по втор пат ќе се заразат со коронавирусот SARS-CoV-2 веројатно ќе имаат помалку вирусни патогени во себе што значи и поблаги симптоми, покажа истражување во Англија.
Според податоците на Канцеларијата за национална статистика (ONS), којашто го спроведе истражувањето, од 19.470 луѓе кои прележале COVID-19, потврдени се 195 случаи на повторно заразување со вирусот.
Анализите исто така откриле дека 99% од позитивните, посериозни случаи откриени во јули се поврзани со делта сојот, во споредба со 92% од јуни и 46% од мај.
Се наведува дека луѓето кои имаат посилен позитивен тест имаат поголема количина патогени и поголема е веројатноста да имаат класични симптоми како кашлица, мачнина и главоболка, а не само губење на осетот за мирис и вкус или гастроинтестинални проблеми како болки во стомакот, дијареја и повраќање.
Истражувањето утврдило дека една од четири помлади личности кои се позитивни на ковид повеќе не ги почитуваат правилата за самоизолација.
