Печеното пиле е одлична идеја за јадење во кое било време од годината. Тоа не само што е вкусно, туку е и здраво затоа што е лесно сварливо и хранливо и не содржи многу штетни масти. Но, за да испечете сочно меко пиле, потребно е познавање неколку важни чекори за негова подготовка
Нема ништо полошо да поминете неколку часови во подготовка на печено пиле, а тоа на крај да биде толку суво и тешко за јадење. Подготовката на меко и сочно пиле не е лесна, како што се чини на „прв поглед“. Бидејќи крилцата и копаните во суштина се мрсниот дел од пилето, најтешко е пилешките гради, кои се суви, да бидат исто така сочни и вкусни.
Претходна подготовка
Има две варијанти за подготовка на пилето пред печење. Првиот е со саламура од сол и вода да го оставите да стои неколку часови. Солта ќе го омекне месото бидејќи ќе дозволи да се апсорбира водата. Втората варијанта е да го маринирате пилето со путер или со маслиново масло и зачини што исто така ќе му даде сочност. Оваа варијанта се препорачува кај помалите пилиња или само одделни делови од пилешко месо. Зачинските тревки што ќе ги изберете, ќе му дадат на јадењето оригинален вкус.
Не плашете се од зачините
Тие се тајната на прекрасната арома и неочекувано добриот вкус. За кожата да е крцкава, најважно е да биде добро истриена со сол. Таа се додава и во внатрешноста на пилето. Друг задолжителен зачин е црниот пипер, кој во комбинација со солта ќе му даде на пилето чист и пријатен вкус. Други зачини се личен избор, а погодни се мајчина душичка, рузмарин, лук, лимон итн. Внатрешноста на пилето можете да ја наполните со цели гранчиња од зачини. Исечкајте чешне лук, преполовете лимон или исечете го на четвртини да добиете рамномерно зачинето и ароматично пилешко. Но, ако при подготовка решите да го ставите пилето во саламура, не го зачинувајте дополнително со сол, туку само користете ги другите зачини.
Не ја тргајте кожата
Кој и да го изберете начин за претходна подготовка, важно е при печење месото да не се исуши брзо. Во тоа помага кожата, која до одреден степен ја задржува влагата и сочноста. Ако не ја сакате кожата, тргнете ја откако ќе го испечете пилето. Важен фактор е и како го вртите пилето. Никогаш при печење не пробувајте со виљушка или со нож дали е готово. Со тоа ќе овозможите да истечат соковите однатре и да се исуши. Вртете го со помош на кујнски прибор со рамни врвови.
Друга варијанта за печeње е да го покриете со фолија. Тоа е француска техника за печење месо под фолија или хартија за печење. Овој начин се препорачува за помали пилиња или парчиња од пиле, не за цели големи пилиња. Пред да ги ставите парчињата месо да се печат со фoлија, добро зачинете ги, па завиткајте ги така што да нема никаков отвор.
Финален трик
Печете на 230 степени околу 25 минути. Цело пиле може да се пече во фолија, која треба да се тргне околу 20 минути пред да се извади од рерна.
По вадење од рерна, кулинарските мајстори препорачуваат да го ставите 15 минути „наопаку“ – со градите кон дното на садот. На тој начин соковите се слеваат во белото месо што ќе го направи дополнително сочно и вкусно.
