Па сега откако успеавме да го оствариме овој голем успех, ние на ЕП одиме без притисок, но не и без амбиции. Ние со самиот пласман сме победници, а секако сме мотивирани да дадеме се од себе и да покажеме дека не случајно сме таму. Имаме квалитет и со макотрпна работа успеавме да стигнеме до ова ниво и спортски е да гледаме напред со други цели и желба за нови предизвици – вели Бејтулаи во интервјуто за Слободен печат.
Фудбалската репрезентација на Македонија годинава за прв пат ќе игра на Европско првество откако минатата година преку баражот во Лигата на нации и победите над Косово и Грузија да дојде до историскиот успех.
Еден од неизоставните членови на репрезентацијата и на одбраната е дефанзивецот и капитен на Шкендија, Егзон Бејтулаи.
Со бескомпромисна борба на Бејтулаи, но и неговите колеги од последната линија Муслиу и Ристевски, одбраната делуваше гранитно во најважните натпревари за македонската репрезентација која конечно дочека да биде дел од Европско првенство со што е остварен сонот на сите македонски фудбалери и фанови.
– Па, иако има поминато одредено време, верувајте ми дека се е како сон и треба понекогаш два пати да размислиш и да се освестиш дека сето тоа е вистина. Ова е огромно достигнување, најголемо во историјата на фудбалот на нашата држава и голема, огромна чест и сатисфакција за мене да знаеш дека и јас сум дал придонес да се одтвари тоа. За еден фудбалер настапот на големо натпреварување како ЕП или СП е еден вид круна на кариерата – вели Бејтулаи во интервју за Слободен печат.
Македонија своите настапи на ЕП ќе ги има во Букурешт и Амстердам против селекциите на Украина, Австрија и Холандија, а Бејтулаи очекува добар настап и како и сите фанови и фудбалери, се надева на изненадување.
– Па сега откако успеавме да го оствариме овој голем успех, ние на ЕП одиме без притисок, но не и без амбиции. Ние со самиот пласман сме победници, а секако сме мотивирани да дадеме се од себе и да покажеме дека не случајно сме таму. Имаме квалитет и со макотрпна работа успеавме да стигнеме до ова ниво и спортски е да гледаме напред со други цели и желба за нови предизвици. Не се залетуваме, но зошто да нема некое изненадување од наша страна.
Покрај настапот на Европското првенство, фудбалската репрезентација на Македонија во март ќе ги започне и квалификациите за СП 2022 година во Катар. Фудбалерите за прв во историјата ќе играат натпревари против една од најсилните репрезентации на светот, Германија, а тука се и Романија, Исланд, Ерменија и Лихтенштајн.
– Да бидам искрен групата е многу интересна и донекаде е таква како што би посакувале пред жрепката. Германија е фаворит и тука нема што да се зборува, а за нас ќе биде голем предизвик да играме против нив. Остантите репрезентации се силни но не и непобедливи. Доколку бидиме вистинските, со добар ритам мислам дека ќе имаме нов добар квалификациски циклус но под услов во секој натпревар да влеземе со максимален пристап бидејќи доколку не сме 100% одговорни и фокусирани, може да се случи изненадување и од репрезентации од типот на Лихтенштајн кој не е за потценување иако од тие дуели уште сега се очекуваат максимални шест бода – вели Бејтулаи кој е неизоставен дел од одбраната на националниот тим.
Интересно е што токму Бејтулаи е единствен стандарден репрезентативец од последниот циклус на Лигата на нации како и на баражите кој настапува во домашниот шампионат.
– Тоа ми дава чест и одговорност бидејќи играм во состав кој е полн со играчи кои играат во многу посилни клубови и лиги. Нормално тоа кажува дека и домашното првенство има квалитет и сите фудбалери кои играат во Првата лига да продолжат да даваат се од себе за да обезбедат место во репрезентацијата. Ништо не е невозможноп, ете јас настапувајќи за Шкендија успеав да се пласирам на ЕП – вели Бејтуали.
Шкендија го донесе Тотенхем во Скопје
Бејтулаи освен со репрезентацијата, имаше одлична полусезона и на клупски план, како капитен ја предводеше Шкендија до есенската титула, а во квлаификациите за Лигата на Европа успеа да дојде до дуел со англискиот гигант Тотенхем.
– Со Шкендија имавме добра есенска полусезона која за жал ја затворивме со прв и единствен пораз во 18. кола. Освоивме вкупно 39, имаме шест бода повеќе од противниците и тоа е добра предност иако можеше да биде и подобро. Имајќи во предвид дека игравме во ненормални услови на пандемија, мораме да бидеме задоволни од настапот во квалификациите за Лига на Европа. Го елиминиравме Симгајит без примен гол, го елиминиравме и Ботошани и во Скопје го донесовме гигантот од Премиер лигата, Тотенхем од кого бевме поразени во една убава фудбалска претстава од наша страна. Зимската пауза ќе ја искористиме за да „ги наполниме батериите“ и на пролет да бидеме уште подобри.
Пандемијата го поремети секојдневието
Фудбалот во 2020 година се играше во чудни услови поради пандемијата на коронавирусот. Прво фудбалерите речиси во цела Европа паузираа четири месеци, а потоа се до крајот на годината играа пред празни трибини. Исклучок не е ниту Првата фудбалска лига.
– Пандемијата влијаеше и на организациски аспект но и на нивото на квалитетот. Коронавирусот го поремети секој сегмент од животот во целиот свет и фудбалот не беше исклучок. Меѓутоа полека се навикнуваме, се обидуваме да бидеме на повисоко ниво иако ништо не е исто како порано. Тренинзи, паузи, патувања со ограничувања, понекогаш и некој позитивен случај и повторно сте надвор од тренажен процес и сето тоа влијае на сите. Сите сме во некаков грч, протоколи, испитувања, тестови, ограничувања, но добро е што и покрај сето тоа фудбалот продолжи да се игра, барем не сме приморани да подолга пауза. Ние сме навикнати на нашите навивачи и нивната поддршка од трибините нормално дека ни недостасува, а табелата по есенскиот дел кажува дека Македонија ЃП и Шкупи ќе ни бидат конкуренти за титулата иако ги респектираме сите екипи вели Бејтулаи кој во 2021 година посакува тоа што го сакаат и сите луѓе на светот.
– Искрено, мислам дека речиси сите жители на светот имаат иста желба, а тоа е да го снема овој вирус, да се вратиме на нашите нормални животи и непречено да функционираме како порано. Здравјето е над се, мир, љубов и многу успеси за сите.
