Холандскиот премиер, Марк Руте, задутре доаѓа во посета на Северна Македонија. Ова е прва посета на премиер на Холандија на земјава во историјата на дипломатските односи меѓу Хаг и Скопје.
Холандија се смета за земја која се залага за „строг, но фер пристап“ во однос на прашањето за интеграција на земјите од Западен Балкан во ЕУ. Таа инсистира пред се на владеење на правото и борба против криминалот и корупцијата.
Последната изјава на Руте за земјава беше дадена на Самитот ЕУ – Западен Балкан во Брдо, Словенија, кога се заложи за што побрзо отворање на пристапниот процес.
„Ќе треба да почекаме на изборите во Бугарија. Не сум среќен со фактот што пристапните преговори со Северна Македонија сè уште се блокирани. Сметам дека тие треба да се деблокираат што е можно побрзо. Знаме и се надеваме дека тоа веројатно ќе се случи по изборите во Бугарија и ќе се обидеме да направиме сè што можеме за тоа да се случи“, изјави Руте во Брдо минатиот месец.
