Филипче: Предложивме полициски час почнувајќи од среда, апелирам на дисциплина

Министерот Венко Филипче се огласи преку социјалните мрежи откако Министерството за здравство соопшти дека Комисијата за заразни болести предложила воведување на полициски час од 22 часот, до 5 часот следниот ден. За ова Владата ќе одлучува на утрешната седница.

Предложивме воведување на полициски час од 22 часот навечер до 5 часот наутро, на територија на цела држава започнувајќи од среда (10.03). Овој предлог е поради тоа што изминативе недели најмногу инфицирани има поради трансмисија на вирусот преку собири, но и непочитување на воведените мерките за носење заштитна опрема, држење дистанца и негрупирање. Апелирам на дисциплина којашто во моментов ни е најпотребна затоа што тоа единствениот начин да се спречи неконтролирано ширење на Ковид 19.