Европската унија ги повика сите странски сили и платеници да си заминат од Либија, истакнувајќи дека тоа е предуслов за враќање на стабилноста во земјата разурната од војна.
Претседателот на Советот на ЕУ, Шарл Мишел на прес-конференцијата во либискиот главен град Триполи, го опиша назначувањето преодна влада на почетокот на оваа година како „историски момент“.
Владата треба да ја води земјата до општите избори закажани на 24 декември.
– Создадовте можност да ја обновите својата земја, но има еден предуслов – сите странски борци и војници мора да ја напуштат земјата, рече Мишел, повикувајќи ги либиските политички и главно вооружени фракции да ја искористат „единствената можност за градење на обединета, суверена, стабилна и просперитетна земја“.
Мишел, кој се состана со лидерите на новоназначената влада, рече дека ЕУ ги поддржува напорите за национално помирување.
