До крајот на неделава зависно од околностите на аеродромот во Кабул, со организирани летови се очекува да пристигнат најголем дел од 450 – те граѓани од Авганистан, соопшти на денешната прес-конференција портпаролот на Владата, Муамет Хоџа.
Тој нагласи дека станува збор за демократско, мирољубиво население, вработени, жени и деца од семејства на оние кои работеле за хуманитарните и мировните мисии, активисти од организациите за човекови права, новинари, преведувачи, студенти, стипендисти, како и граѓани кои изминатите 20 години биле поддршка за НАТО сојузничките сили во Авганистан, вклучително и на Армијата на РСМ.
– Според информациите, Северна Македонија беше меѓу првите, ако не и прва земја, која сама пристапи на САД и понуди помош за овие луѓе кои се под опасност по доаѓањето на талибанскиот режим во Авганистан, рече портпаролот Хоџа.
Хоџа уверува дека не постои ризик од мигрантска криза, ниту пак, оваа хуманитарна операција треба да се поврзува со Прифатниот центар за странци или мигрантските кампови на северната и јужната граница од нашата држава, туку е дел од голема светска хуманитарна акција.
Трошоците за нивното сместување во неколку хотели и мотели во земјата, наведе Хоџа, во целост ќе бидат покриени од меѓународните организации и од САД, се до нивното заминување во САД или во трети земји како нивна крајна дестинација.
