Бугарската авиокомпанија GullivAir успешно ги поминала сите процедури пред американските воздухопловни власти и се подготвува да започне редовни летови до Њујорк и Чикаго во април 2026 година, јавува БГНЕС, пренесува Трибуна. Во тек се финални преговори за добивање на слотови на аеродромите „Џон Ф. Кенеди“ и Чикаго, соопшти вицепремиерот и министер за транспорт и врски Гроздан Караџов за време на националната дискусија „Туризам и воздушна поврзаност. Традиционални дестинации и нови пазари. Клучот за одржлив раст“.
Караџов нагласи дека директните линии со САД ќе отворат нови пазари за бугарскиот туристички производ, ќе ги олеснат бизнис контактите и ќе придонесат за засилен културен и економски обмен меѓу двете земји.
Паралелно со тоа, воздушниот сообраќај во Бугарија продолжува да расте. Според министерот, до крајот на 2025 година аеродромот „Васил Левски“ во Софија ќе достигне 8,4 милиони патници, што претставува рекорден резултат. За првите девет месеци од годината преку главниот аеродром поминале над 6,28 милиони патници и повеќе од 51 илјада летови, што е раст од 5% во однос на истиот период во 2024 година.
И аеродромите во Варна и Бургас бележат рекордни бројки – над 1,5 милион патници во Варна и 1,8 милиони во Бургас, што е резултат изедначен со целата минатогодишна сезона уште до крајот на септември.
