Бугарија потпиша договор со Светската туристичка организација за домаќин на глобалната конференција за вински туризам, јавува БГНЕС, пренесува Трибуна.
Министерот за туризам на Република Бугарија Мирослав Боршош и генералниот секретар на специјализираната агенција на ОOН Зураб Пололикашвили официјално го потпишаа договорот Бугарија да биде домаќин на Деветтата глобална конференција за вински туризам на Светската туристичка организација на ООН (UN Tourism).
Датумите на кои ќе се одржи престижниот форум во Пловдив се 6 и 7 октомври. Договорот за организација на настанот е потпишан во седиштето на ООН за туризам во Мадрид.
„Очекуваме настанот да собере делегации од земјите ширум светот и да ја етаблира Бугарија како преферирана туристичка дестинација на светската мапа. За нас ова е стратешка шанса не само да ја претставиме нашата земја како винска дестинација, туку и да го поврземе виното со богатата разновидност на туристички искуства што ги нуди Бугарија – од планински и авантуристички, до културен, гастрономски и урбан туризам“, рече министерот Боршош.
Виното не е само производ со висока додадена вредност, туку и културен симбол кој со себе носи историја, тероар и идентитет. Затоа винскиот туризам има потенцијал да биде силен катализатор за развој на други видови туризам и да го продолжи престојот на туристите преку придружните искуства – дегустации, фестивали, тури во винаријата, кулинарски рути и рути во руралните области.
Во април, министерот Боршош, градоначалникот на Пловдив Костадин Димитров и експерти од општината и министерството посетија клучни локации во градот погодни за настани од ваков обем. Одличната координација со локалните власти и докажаниот организациски капацитет го направија Пловдив природен избор да биде домаќин на престижниот форум.
Развојот на винскиот туризам, како специјализиран сегмент со долгогодишни традиции во Бугарија, ќе придонесе за одржлив развој на секторот и зголемување на неговата конкурентност. Глобалната конференција ќе ја стави Бугарија во фокусот на меѓународната туристичка заедница и ќе даде поттик за нови партнерства, инвестиции и одржливи туристички политики.
