Министерот за енергетика на Бугарија, Жечо Станков, и неговиот американски колега – секретарот за енергетика Кристофер Рајт, потпишаа заедничкa изјавa за потврдa на целите на меѓувладиниот договор меѓу двете држави за унапредување на цивилната нуклеарна соработка. Документот беше потпишан во рамките на Генералната конференција на Меѓународната агенција за атомска енергија, што се одржува во Виена, Австрија, јавува БГНЕС, пренесува Трибуна.
Со изјавата, двете земји потврдуваат дека ќе соработуваат во развојот и имплементацијата на иновативни технологии за нуклеарни реактори, со цел подобрување на економската сигурност и енергетската одржливост на Бугарија. Поддршката ќе биде обезбедена од Канцеларијата за нуклеарна енергија при Министерството за енергетика на САД.
Бугарија ќе добие пристап до експертското знаење на американските лаборатории за спроведување на предпроектна студија за изводливоста и соодветноста на потенцијални локации за забрзано воведување на мали модуларни реактори (SMR). Американската агенција за трговија и развој веќе најави подготвеност да обезбеди финансирање за преглед на различни технологии за SMR, за да се идентификуваат најпогодните за бугарските услови.
„Нуклеарната енергија има клучна улога во остварувањето на заедничките европски цели за енергетска сигурност и конкурентност. Со поддршката од нашите партнери од САД, Бугарија ќе може да го развие и надгради своето повеќедецениско искуство во безбедното користење на нуклеарни капацитети, потврдувајќи ја својата улога како лидер во производството на беземисиона, чиста и достапна енергија за целиот регион на Југоисточна Европа,“ изјави министерот Жечо Станков при потпишувањето.
Заедничкото изјава ја продлабочува соработката меѓу Бугарија и САД во областа на нуклеарната енергија и претставува значаен чекор во стратешкото партнерство меѓу двете држави.
Следната недела, министерот Станков ќе биде дел од бугарската делегација предводена од премиерот Росен Желјазков во Њујорк, каде ќе учествува на општата дебата на 80-тата сесија на Генералното собрание на ОН. Во рамките на посетата, тој ќе има средби со американски владини и корпоративни претставници за идниот развој на нуклеарната енергетика.
