Mинистерот за здравство, Венко Филипче потврди дека британскиот сој на коронавирусот бил детектиран во приватната лабораторија на клиниката Жан Митрев во Скопје, кај 46-годишен маж, кој е веќе оздравен.
Филипче тврди дека вирусот бил детектиран во болницата при анализа на примероци од јануари, а пациентот не пријавил контакти, ниту пак навел дека патувал во странство.
Пациентот првпат на 29 декември 2020 година, поради покачена температура и отежнато дишење, направил брз тест, кој бил со позитивен.
По неколку дена, односно на 4 јануари 2021 година се јавува на преглед во приватната болница Жан Митрев каде му е направен ПЦР тест кој е позитивен, а пациентот е веднаш хоспитализиран во приватната болница. На 15 јануари во болницата му е направен уште еден тест кој повторно е позитивен.
Во базата на податоци на Институтот за јавно здравје пациентот од 22 јануари 2021 се води како оздравен.
Лабораторијата во Жан Митрев утврдила дека пациентот е суспектен на некоја мутација на вирусот, а потоа е направено секвенционирање на изолатот.
Според информацијата која ја проследија до Министерството за здравство, сите мутации кои го дефинираат британскиот сој се утврдени кај изолатот од овој пациент. Кај останатите примероци кои се анализирани во приватната лабараторија не е детектиран британскиот сој на СарсКов2, информира Филипче на Фејсбук.
