Бугарија и Северна Македонија ја потврдија својата посветеност за продолжување на изградбата на железничкиот Коридор 8 според Регулативата за трансевропска транспортна мрежа, јавува БГНЕС, пренесува Трибуна.
Веста стана јасна по средбата на високо ниво во Брисел меѓу Европската комисија, Бисер Минчев, заменик министер за транспорт и врски на Бугарија, Стефан Волкановски, државен секретар во Министерството за транспорт на Северна Македонија, Синиша Ивановски, директор за железничка инфраструктура. во Северна Македонија, финансиските институции ЕИБ и ЕБОР и Секретаријатот на Транспортната заедница.
Двете страни се договорија да одржуваат редовен дијалог на високо ниво и да формираат заедничка работна група за Коридорот 8. Покрај тоа, релевантните министерства ќе работат на изнаоѓање координирано техничко решение за изградба на прекуграничниот дел од коридорот. Северна Македонија и Бугарија, исто така, ја поздравуваат поддршката на Европскиот координатор за Западен Балкан – Источен Медитерански Коридор и Постојаниот секретаријат на Транспортната заедница за напредок на Коридорот 8.
„Коридорот 8 е критична железничка врска за целиот регион и за ЕУ. Тој ќе обезбеди побрзо патување на стоки и патници, ќе ја зголеми мобилноста, пристапот на пазарот и конкурентноста во Западен Балкан. Комисијата ја поздравува реафирмацијата на посветеноста на Бугарија и Северна Македонија во однос на Коридорот 8, што ја покажува желбата за регионална соработка суштинска за иднината на двете земји“, се вели во ставот на ЕК.
Источниот дел од Коридорот 8 ги поврзува Северна Македонија и Бугарија и е дел од европскиот коридор „Западен Балкан – Источен Медитеран“. Со финансиска помош на ЕУ за подготовка на проектите и кофинансирање на инвестициите во рамките на Економскиот инвестициски план за Западен Балкан, Северна Македонија и Албанија ги модернизираат постоечките линии и ги градат врските што недостасуваат долж коридорот.
