Поранешната претседателка на Државната комисија за спречување на корупцијата (ДКСК), Билјана Ивановска, остро ја осуди актуелната ситуација во која е инволвирана сегашната претседателка Татјана Димитровска, осомничена за испраќање пораки на осомничен во случајот „Адитив“.
Во својата изјава, Билјана Ивановска оцени дека станува збор за „тежок удар за општеството, за институцијата и за граѓаните“, и повика Татјана Димитровска веднаш да поднесе оставка.
„Сега треба да гледаме како понатаму. Тука е Собранието, сите членови на Комисијата одговараат пред Собранието. Што може самата институција да направи. Сега да се преиспита, со какви контроли и механизми ќе се постапува понатаму. Не треба да се седи со скрстени раце. Претседателката мора да поднесе оставка, на овој начин и натаму ја инфицира институцијата“, рече Ивановска.
Инаку, членовите на ДКСК одговараат директно пред Собранието, кое има обврска да постапува во вакви ситуации.
