Српскиот министер за градежништво, транспорт и инфраструктура, Горан Весиќ, лично призна дека режимот на Александар Вучиќ бил вклучен во стопирањето на изградбата на Коридорот 8, кој треба да го поврзе Црното со Јадранското Море, јавува БГНЕС.
„Во Европската Унија го туркаа коридорот од Бугарија до Албанија, како и оној од Романија до Грција. Ова мрачно сценарио за Србија го избегнавме со одлуката на Александар Вучиќ Белград да почне да инвестира во железничката пруга од Коридорот 10“, отворено изјави Весиќ.
Според него, „Србија мора да се бори да биде централна земја низ која минуваат сите железнички линии“.
Дописникот на БГНЕС од Скопје потсети дека првата одлука на владата на Христијан Мицкоски во Република Македонија била да се запре изградбата на Коридорот 8. Десната рака на Мицкоски, Александар Николоски, дури најави пренасочување на европските средства обезбедени за овој транспортен коридор за Коридор 10.
